Aqtaýda mektep oqýshylary tóbelesip, bir bala aýrýhanaǵa jatqyzyldy
AQTAÝ. KAZINFORM — Aqtaýda dene shynyqtyrý sabaǵynda 10 jáne 11-synyp oqýshylary arasynda tóbeles bolyp, eki oqýshy medıtsınalyq kómekke júgindi. Olardyń bireýi aýrýhanaǵa jatqyzyldy.
Oqıǵa 5 qazanda № 1 jalpy bilim beretin mektepte dene shynyqtyrý sabaǵy kezinde bolǵan. Zardap shekken oqýshylardyń biriniń anasynyń aıtýynsha, uly synyptastarymen fýtbol oınap júrgen. Alańda 11-synyp oqýshylary da bolǵan. Oıyn barysynda onyń uly men joǵary synyp oqýshylarynyń biri arasynda sózge kelispeýshilik týyndaǵan.
Áıeldiń aıtýynsha, janjalǵa basqa da 11-synyp oqýshylary qosylyp, ulyn birneshe adam bolyp urǵan. Oǵan arasha túspek bolǵan synyptasy da soqqy alǵan. Tóbelesten keıin eki 10-synyp oqýshysy da qabyldaý bólimine jetkizilgen. Olardyń bireýi aýrýhanaǵa jatqyzyldy.
— Ulym tóbeles kezinde birneshe ret esinen tanyp qalǵan. Denesinde soqqydan qalǵan jaraqattar men gematomalar bar. Basy aınalyp, júregi aınyp, qusyp jatyr. Mıy shaıqalýy múmkin dep alańdap otyrmyn, — deıdi balanyń anasy.
Onyń aıtýynsha, oqıǵa kezinde dene shynyqtyrý pániniń muǵalimi de sabaqta bolǵan. Alaıda muǵalim janjaldy der kezinde toqtata almaǵan.
Mańǵystaý oblystyq bilim basqarmasynyń málimetinshe, oqıǵaǵa qatysty mektep ákimshiligi tarapynan tıisti sharalar qabyldanyp, oqýshylarmen jáne ata-analarymen túsindirý jumystary júrgizilgen. Ata-analar zańnamaǵa sáıkes ákimshilik jaýapkershilikke tartylyp, aıyppul salynǵan. Al, dene shynyqtyrý pániniń muǵalimi men dırektordyń tárbıe isi jónindegi orynbasary Qazaqstan Respýblıkasy Eńbek kodeksiniń 64-babyna sáıkes tártiptik jaýapkershilikke tartylǵan.
Osy oqıǵadan keıin, bilim basqarmasynyń nusqaýymen mektepte oqýshylardyń qaýipsizdigin qamtamasyz etý jáne quqyq buzýdyń aldyn alý jumystary kúsheıtilgen.
Buǵan deıin, Mańǵystaýda Ybyqty saıda jartasqa jazý jazǵan er adam ustaldy.
