Aqtaýda máslıhat depýtaty qamqor bolam degen jeleýmen «Kaspıı» klýbynan aqsha alyp otyrǵan

AQTAÝ. QazAqparat - Mańǵystaý oblysy máslıhatynyń depýtaty Ahmet Salmanov sottaldy. Bul týraly QR Sybaılas jemqorlyqqa qarsy is-qımyl agenttiginiń Mańǵystaý oblysy boıynsha agenttiginiń baspasóz qyzmetinen málim etti, dep habarlaıdy QazAqparat tilshisi.

Vedomstvo málimetinshe, 25 qarashada Aqtaý qalalyq sotynyń úkimimen Mańǵystaý oblysy máslıhatynyń depýtaty Ahmet Salmanov alaıaqtyq jasaǵany úshin kináli dep tanylǵan.

Oǵan zańsyz jolmen alynǵan qarajat somasynan on ese kóp aıyppul salyndy.

Sondaı-aq ol ómir boıy memlekettik qyzmette jumys isteı almaıdy.

«Ahmet Salmanov 2021 jyldyń mamyr aıynan bastap 2022 jyldyń shildesine deıin alaıaqtyq jolmen «Kaspıı» fýtbol klýbyna jalpy qamqorlyq kórsetem jáne fýtbol klýbyn ustaýǵa oblystyq bıýdjetten qarajat bólýge járdemdesem degen jeleýmen klýb dırektorynyń 766 000 teńge qarajatyn qaltasyna basqan» delingen málimette.

Osylaısha, sottalǵan adam 7 mln 660 myń teńge tóleýi tıis. Úkim zańdy kúshine endi.