Aqtaýda Mańǵystaý oblysy etnomádenı birlestiginiń 25 jyldyǵy atalyp ótti
ASTANA. QazAqparat - Qazaqstandaǵy koreı ultynyń 80 jyldyǵy jáne Mańǵystaý oblysy etnomádenı birlestiginiń qurylǵanyna 25 jyl tolýyna oraı oblystyq Nurmuhan Jantórın atyndaǵy mýzykalyq-drama teatrynda saltanatty shara ótti. Sonymen qatar jergilikti sýretshilerdiń jumystarynan jasaqtalǵan jáne etnomádenı birlestiginiń qoldanbaly shyǵarmashylyq kórmesi uıymdastyryldy, dep habarlaıdy ákimdiktiń baspasóz qyzmeti.
1937 jyldary 100 myńdaı qıyr shyǵys káristeri elimizdiń ár aımaǵyna jer aýdarylǵan bolatyn. Joldan ábden qajyp, qaljyraǵan koreı ultyn qazaqtar bolmysyna saı qushaǵyn aıqara ashyp, emin-jarqyn kóńil kúımen qarsy aldy.
Qanshama qaıǵy-qasiret pen qýǵyn-súrgindi basynan ótkergen qazaq halqy taǵdyrlas koreı halqynyń jan azabyn tereń túsinip, baýyryna basty. Búginde oblysta 800-den astam káris ultynyń ókili tatý-tátti ómir súrýde. Bul - eki eldiń ózara yntymaqtastyǵy men birliginiń belgisi.
Ótkenge kóz júgirtsek, 1989 jyly Aqtaý qalasynda turatyn káristerdiń quryltaı sezi ótip, onda káris ulttyq mádenı ortalyǵy qurylǵan bolatyn. Sodan beri óz jumysyn toqtatpaǵan etnomádenı birlestik qazirgi kúni oblysymyzdyń barlyq sharalaryna belsendi qatysyp júr.
«Búgingi tańda elimizdegi káris ultynyń ókilderi Qazaqstannyń ajyramas bóligine aınaldy. Postkeńestik kezeńdegi basqa elge qonys aýdarýǵa qaramastan, keıbir ulttar Qazaqstanda turaqty ómir súrýdi qalady. Qazaq elin olar óz úıindeı sezindi. Aqtaýdyń qala bolyp qalyptasýyna úlesin qosqan túrli ult ókilderiniń arasynda sizderdiń de oryndaryńyz bir tóbe», - dedi Mańǵystaý oblysynyń ákimi Eraly Toǵjanov.
