Aqtaýda maqta-mata fabrıkanyń qurylysy bastaldy
Aqtaýda úndistandyq ınvestorlarmen birikken 6 jobanyń tusaýy kesildi. Onyń 4-i ındýstrıaldyq aımaqta boı kóterse, 2-i Jańaózen qalasynda júzege aspaq. Jobalardyń quny 500 mıllıard teńgeni quraıdy.
Búgin qurylysy qalanǵan maqta-mata óndiretin iri fabrıka kúnine 80 tonna toqyma jipten 60 myń metr mata óndirýge qaýqarly. Toqyma fabrıkasyn salý jobasy boıynsha 97 mlrd. teńge ınvestıtsııalanady. Jańa kásiporyn jylyna 32,4 myń tonna ıirilgen jip shyǵarady. Qurylys kezeńinde 200 adam jumys istep, paıdalaný barysynda 700 adamdy jumyspen qamtý josparlanyp otyr. Paıdalanýǵa berý ýaqyty - 2019 jyldyń mamyr aıy. Qazaqstandyq jáne ishinara Ózbekstandyq shıkizat qoldanylyp, daıyn ónimdi shet elderge jetkizý josparlanǵan.
«Bul kásiporyn aımaq úshin tıimdi joba. Óńirdiń ındýstrıaldyq-ınnovatsııalyq damýyna úles qosyp, shaǵyn jáne orta bıznestiń damýyna jańa serpin bermek. Jalpy 4 joba boıynsha ınvestıtsııa kólemi 360 mlrd. teńgeni quraıdy, jumys oryndarynyń sany 895 adam. Oblysymyzǵa tartylatyn ınvestıtsııanyń jalpy somasy 522,4 mlrd. teńgeni quraıdy»,- dedi oblys ákimi Eraly Toǵjanov.
Úndistandyq ınvestorlar bul jobanyń eki jaqqa da tıimdi ekenine senimdi. Sondaı-aq Qazaqstanmen bıznes seriktes bolǵanyna qýanyshty ekenderin jasyrmady.
60 gektarǵa salynatyn kásiporyn aýmaǵynda maqta-mata óndiretin fabrıkadan bólek gaz týrbınalyq elektrostantsııa, ferrohrom zaýyty men metal qaqtaıtyn óndiris orny ashylmaq.
«4 zaýyt birge keshendi túrde júzege asyrylatyn bolady. Olardyń barlyǵy bıylǵy jylǵa josparlanyp otyr. 2019 jyly barlyq kásiporyn iske qosylady degen jospar bar»,-deıdi "Kaspıı" ÁKK basqarma tóraǵasynyń m.a. Lesbek Ilebaev.
Budan bólek dál osyndaı eki zaýyt Jańaózen qalasynda ashylady. Atalǵan jobalar óńirdiń ekonomıkalyq órkendeýine úles qospaq.