Aqtaýda magıstraldy qubyrdyń ústindegi qurylysqa qatysty daý shyqty
AQTAÝ. KAZINFORM — Aqtaýda turǵyndar úıleriniń mańynda salynyp jatqan nysanǵa narazylyq bildirýde. Turǵyndardyń aıtýynsha, qurylys magıstraldy ınjenerlik jeliler ótetin jáne qyzyl syzyqqa jaqyn aýmaqta júrgizilip jatyr. Al kásipker jer ýchaskesi zańdy túrde jalǵa alynǵanyn jáne qajetti qujattary bar ekenin aıtady.
Turǵyndar qurylys qorshaýy jaıaý júrginshilerdiń qozǵalysyna kedergi keltirip, aýmaqtaǵy jasyl jelekke de zııan kelgenin aıtyp otyr.
— Bul nege qyzyl syzyqtyń ústine salynady? Biz sony túsinbeımiz. Bul — halyq júretin jer. Munda kólik te qatynaıdy. Balalarymyzǵa alańdaımyz, olardy bólek jibere almaımyz, — deıdi qala turǵyny Salamat Júsipov.
Taǵy bir turǵyn Aınagúl Tasqynbaevanyń aıtýynsha, buǵan deıin qyzyl syzyq pen ınjenerlik jeliler ornalasqan aýmaqta qurylys júrgizýge bolmaıtyny aıtylǵan.
Al kásipker jer telimin zańdy túrde jalǵa alǵanyn jáne qurylysqa qajetti qujattary bar ekenin málimdedi. Onyń aıtýynsha, aýmaqtaǵy aǵashtardy belgilengen tártippen basqa jerge kóshirý máselesi boıynsha jaýapty mekemege resmı hat joldanǵan.
— Jer ýchaskesiniń kólemi qalaı berildi, sol boıynsha aldyq. Tıisti qaýly bar. Eger qubyrda aqaý bolyp, ony aýystyrý qajet bolsa, jóndeý jumystaryna múmkindik beremin, — deıdi kásipker Abzal Lekerov.
Aqtaý qalalyq sáýlet jáne qala qurylysy bólimi de jer ýchaskesi kásipkerlik maqsatta jalǵa berilgenin rastady.
— Turǵyndardyń aryzy negizinde tekserý júrgizildi. Kásipker jer ýchaskesin 2020-2025 jyldarǵa arnalǵan baǵdarlama aıasynda rásimdegen. Eskızdik jobasy da kelisilgen, — dedi Aqtaý qalalyq sáýlet jáne qala qurylysy bólimi basshysynyń orynbasary Begaly Hojahmetov.
Alaıda magıstraldy ınjenerlik jelilerdiń qaýipsizdigine jaýapty «Kaspıı jylý, sý arnasy» memlekettik kommýnaldyq kásiporny qurylysqa kelisim berilmegenin málimdedi.
Mekeme ókili Álııa Júzbaevanyń aıtýynsha, 2023 jylǵy 11 sáýirde jer ýchaskesine qatysty kelisim alý úshin ótinish túsken. Alaıda ınjenerlik jeliler men olardyń kúzet aımaǵy ornalasqandyqtan, kásiporyn qurylys júrgizýge kelisim bermegen.
Qazir osy máselege baılanysty mekeme Aqtaý qalasynyń ákimdigine resmı aryz joldaǵan. Ákimdik aryzdy 14 jumys kúni ishinde qaraıdy. Osydan keıin daýly aýmaqtaǵy qurylystyń ári qaraı jalǵasatyny nemese toqtatylatyny belgili bolady.
Buǵan deıin Aqtaýda jańa oqý jyly bastalǵaly mektepterge baratyn joldar men jaıaý júrginshiler jolynyń jaǵdaıyna qatysty turǵyndardyń shaǵymy kóbeıgenin jazǵan edik.
