Aqtaýda «MAEK» JShS aýmaǵynda táýligine 6 myń tekshe metr sý tuşytatyn qondyrǵy iske qosyldy
AQTAÝ. KAZINFORM – Aqtaý qalasynda jazǵy ýaqyttaǵy sý tapshylyǵyn azaıtý maqsatynda josparlanǵan jumystar qarqyndy júrip jatyr. Aldaǵy tamyz aıyna 2 joba iske qosylmaq. Bul týraly Mańǵystaý oblysy ákiminiń baspasóz qyzmeti habarlady.
«Kaspıı» sý tushytý zaýytynyń qýatyn táýligine 20 000 tekshe metrden 40 000 tekshe metrge deıin ulǵaıtý» jobasy aıaqtalýǵa jaqyn. Qurylys montaj jumystary 95% oryndaldy. Búgingi kúni tehnıkalyq jabdyqtar kedendik rásimderden ótip, zaýytqa jetkizildi.
Mańǵystaý oblystyq energetıka jáne turǵyn úı — kommýnaldyq sharýashylyǵy basqarmasynyń málimetinshe, tamyz aıynda oblys turǵyndaryna aýyz sý berile bastaıdy.
— Shilde aıynyń sońyna deıin montaj jumystaryn tolyq aıaqtap, al tamyz aıynda iske qosý josparlanyp otyr. Osy oraıda, oblys turǵyndaryn keltirilgen qolaısyzdyqtarǵa túsinistikpen qarap, sabyrlyq tanytýdy suraımyz, — dedi oblystyq energetıka jáne TKSh basqarmasynyń bas mamany Muhamed Júsip.
Sondaı-aq, Mańǵystaý atom energııa kombınatynda OSJT-2 (ekinshi ortalyq sýmen jabdyqtaý toraby) aýmaǵynda táýligine 6 000 tekshemetr sý tushytatyn qondyrǵylary iske qosyldy.
Atalǵan qondyrǵylardy satyp alý úshin 2023 jyly «JanSý 362» JShS-men shart jasaýǵa oblys bıýdjetinen qarjy bólingen edi.
— Tuşylandyrýǵa arnalǵan bastapqy sý Quıylys-Melovoe ken ornynan shyǵatyn jerasty sýy. Qazir montaj jumystary aıaqtalyp, iske qosyldy. Jaqyn kúnderi qala turǵyndaryna táýligine 6000 tekshe metr kóleminde aýyz sý qosymsha beriledi, — dedi oblystyq energetıka jáne TKSh basqarmasynyń bas mamany Muhamed Júsip.
Keshe Aqtaýda turǵyndar 19 ben 16 shaǵyn aýdandardyń ortasyndaǵy avtokólik jolyn jaýyp, jergilikti bılikten sý berýdi talap etken bolatyn.
Polıtsııa qyzmetkerleri jol kólik apatynyń aldyn alý maqsatynda, jınalǵandardan joldan shyǵýdy surady. Sodan soń turǵyndarǵa Aqtaý qalasy ákiminiń mindetin atqarýshy Nurtas Salı kelip, aýyz sý tapshylyǵyn joıý úshin jasalyp jatqan sharalardy túsindirdi.
Mańǵystaý atom energııa kombınatynyń ókili Vladımır Vasılev qalada qaıtadan sý tapshylyǵy bastalǵanyn málimdedi. Oǵan aptap yqtyqtan teńiz sýynyń jylynýy men aýyz sýdy tutyný kóleminiń artýy sebep bolǵan. Al teńiz sýynyń temperatýrasy kóterilgende kombınattyń sý óndirý kólemi tómendeıdi. Osyǵan oraı, kesheden beri Aqtaýda kólik jýý oryndarynyń jumysyna ýaqytsha shekteý qoıyldy.
