Aqtaýda «MAEK» mekemesine tarıftik zańbuzýshylyqtar úshin aıyppul salyndy

AQTAÝ. KAZINFORM – «MAEK» JShS turǵyndarǵa qatysty tarıfti durys qoldanbaı, qosymsha talaptar qoıǵan. Tutynýshylar Tabıǵı monopolııalardy retteý komıtetine shaǵymdanyp, kóp uzamaı kásiporynǵa aıyppul salyndy.

Aqtaýlyqtar «MAEK» energokombınatynyń áreketine qatysty shaǵymdy jeltoqsan aıynda e-Otinish platformasy arqyly túsirgen. Soǵan baılanysty Mańǵystaý oblysy boıynsha Tabıǵı monopolııalardy retteý komıteti departamenti «MAEK» JShS qyzmetine jospardan tys tekserý júrgizgen. 

Tekserý qorytyndysy boıynsha retteletin qyzmetterdi usyný jáne olarǵa qol jetkizý tártibin buzý faktileri boıynsha ákimshilik is qozǵalǵan. 

– «Tabıǵı monopolııalar týraly» zańǵa sáıkes, tabıǵı monopolııa sýbektisi retteletin qyzmetti ýákiletti organ bekitken tarıf boıynsha usynýǵa mindetti jáne kórsetiletin qyzmetke qatysy joq qosymsha talaptar qoıýǵa quqyly emes. Jospardan tys tekserý barysynda «MAEK» tutynýshylarǵa qyzmet kórsetý kezinde jeke tulǵalar úshin tarıfti durys qoldanbaǵany, sondaı-aq zańnamada kózdelmegen qosymsha talaptar engizgeni anyqtaldy, - delingen habarlamada.

Departament tarapynan energokombınatqa anyqtalǵan zańbuzýshylyqtardy joıý týraly nusqama berilgen. Sonymen qatar 3 151 270 teńge kóleminde ákimshilik aıyppul salyndy. Aıyppul tolyq óndirilip, memlekettik bıýdjet kirisine aýdarylǵan. 

Buǵan deıin, Aqtaýda tabıǵat janashyrlary aqqýlardy nanmen qorektendirmeýge shaqyrdy.