Aqtaýda Land cruiser prado úsh kólik pen mektep qorshaýyn qıratty

AQTAÝ. QazAqparat - Land cruiser prado avtokóligi úsh avtomobılge jáne mekteptiń qorshaýyna soǵyldy, dep habarlaıdy «QazAqparat» HAA lada.kz-ke silteme jasap.

Jol-kólik oqıǵasy búgin, 16 shildede oryn alǵan. Basylymnyń málimetterine sáıkes, avtokóliktiń rýlinde kámelet jasqa tolmaǵan bala bolǵan. Ol rýlge ıe bola almaı, aldymen toqtap turǵan eki avtokólikke, artynan mekteptiń qorshaýyna soǵylǵan. Sondaı-aq ekpinimen baryp, jaqyn mańda turǵan taǵy bir mashınany qaqqan. Abyroı bolǵanda, eshkim zardap shekpegen.

«Jol-kólik oqıǵasynyń saldarynan zardap shekkender joq. Atalmysh faktige qatysty QR ÁQBtK 610 babynyń 3 bóligi boıynsha hattama toltyryldy. Materıal protsessýaldyq sheshim qabyldaý úshin sotqa jiberiledi», - dep málim etti Mańǵystaý oblysy polıtsııa departamentiniń baspasóz qyzmetindegiler.