Aqtaýda qyzymen birge úshinshi qabattan sekirgen áıel polıtseılerden qashqan
ASTANA. QazAqparat - Aqtaýda 40 jastaǵy áıel qyzymen birge úshinshi qabattan jastyq qushaqtap sekirgen, dep jazady Lada.kz.
Oqys oqıǵa 17 qazan kúni keshki 22:00 shamasynda 11-yqshamaýdandaǵy 29-úıde boldy. Bes qabatty úıdiń túbinde jatqan áıel men jas qyzdy kórshi úıdiń turǵyny baıqap qalǵan. Olar qazir Mańǵystaý oblystyq aýrýhanasynda jatyr.
Áıel 1977 jylǵy, al qyzy 2002 jyly týǵan. Olar qulaǵan jerden jastyqtar tabylǵan. Soǵan qaraǵanda bıikten jumsaq túsý úshin jastyq qushaqtap sekirgen kórinedi.
Medıtsınalyq kómek kórsetilgennen keıin, olar travmotologııa bólimine aýystyryldy. Qazirgi densaýlyq jaǵdaılary turaqty.
«Tergeý amaldary barysynda Shymkent ІІB KPB-iniń eki jedel qyzmetkeri OQO ІІD basshysynyń urlyq deregi boıynsha sotqa deıingi tergeý amaldaryn júrgizý jónindegi buıryǵymen Aqtaý qalasyna kelgeni anyqtaldy. Olar áıeldiń meken-jaıyn anyqtaǵan. Ol Aqtaýda óziniń kámelettik jasqa tolmaǵan qyzymen turǵan. Ekeýi 11-29-83 mekenjaıyndaǵy jaldamaly páterge jetkiziledi. Keıin áıel men qyzy balkonnan sekirip ketken», - dep habarlady Mańǵystaý oblystyq prokýratýrasynyń baspasóz qyzmeti.
Vedomstvo atalǵan oqıǵa materıaldary QR QK-iniń 362-baby 4-bóliminde kózdelgen «Bılikti nemese laýazymdyq ókilettikterdi asyra paıdalaný» boıynsha sotqa deıingi tergeýdiń biryńǵaı tizilimine tirkelgenin málim etti.
