Aqtaýda qyzmet babynda qaza tapqan polıtseı bilim alǵan mektepte erlik taqtasy ashyldy

AQTAÝ. QazAqparat - Qazaqstan polıtsııasy kúnine oraı Aqtaý qalasyndaǵy №21 jalpy bilim beretin orta mektepte qyzmet babynda qaza tapqan polıtseı Ádilet Tursynbekovke arnalǵan erlik taqtasy ashyldy, dep habarlaıdy QazAqparat tilshisi.

Ádilet Tursynbekov 1986 jyly 23 qazanda Mańǵystaý oblysynyń Aqtaý qalasynda dúnıege kelgen.

1993 jyly qaladaǵy №21 mekteptiń birinshi synybyna qabyldandy. Mektep qabyrǵasynda jáne joǵarǵy oqý oryndarynda oqyǵan kezderinde qoǵamdyq jumystarǵa, túrli sporttyq jarystarǵa belsene qatysqan.

2004 jyly atalǵan mektepti bitirip, Almaty qalasyndaǵy Qazaqstan Respýblıkasy ІІM Akademııasyna kúndizgi bólimge oqýǵa túsken.

2008 jyly Akademııany zańger mamandyǵy boıynsha bitirip, Mańǵystaý oblysy Іshki ister departamentine qyzmetke ornalasty.

Ádilet Aqtaý qalasy ІІB tergeý bóliminiń tergeýshisi, ІІD uıymdasqan qylmyspen kúres basqarmasynyń jedel ýákili laýazymynda qyzmet atqarǵan.

2011 jyly polıtsııa aǵa leıtenanty Ádilet Tursynbekov qyzmet babynda qaıtys boldy.

Erlik taqtasynyń ashylýyna PD bastyǵynyń orynbasary, polıtsııa polkovnıgi Bolatbek Aqshaýov, Ádilettiń anasy, dostary jáne ustazdary qatysty.

Sonymen qatar búgin qoldaryna dıplom alǵan akademııa túlekteri de bul ádemi kórinistiń kýási boldy.

Shara qatysýshylary Ádilet Tursynbekovtyń qurmetine bir mınýt únsizdik jarııalady.

Batyrdyń anasy men PD bastyǵynyń orynbasary erlik taqtasynyń qyzyl lentasyn kesip, eske alý buryshy saltanatty túrde ashyldy.

«Ádilet - óte tájirıbeli, óz isine jaýapkershilikpen qarap, jumysyn súıispenshilikpen atqarǵan áriptesterimizdiń biri edi. Búgin erlikpen qaza tapqan áriptesimizdiń qurmetine 10 jyl bilim alǵan ordasynan erlik taqtasyn ashyp otyrmyz. Beıbit kúnniń batyrlaryna aınalyp, azamattardyń qaýipsizdigi úshin janyn qıǵan áriptesimizdiń erligi árqashan jadymyzda saqtalady. Keler urpaq úshin olardyń batyrlyǵyn mıras etip jetkizý - bizge mindet», – dedi Bolatbek Aqshaýov.