Aqtaýda qyzdar arasynda bokstan el chempıonaty bastaldy
Jarystyń ashylý saltanatynda Mańǵystaý oblystyq dene shynyqtyrý jáne sport basqarmasynyń basshysy Qanat Jumabaev, Álem jáne Azııa chempıony Erdos Jańabergenov, Olımpıada oıyndary men Álem chempıonattarynyń eki dúrkin kúmis júldegeri Ádilbek Nııazymbetov sóz alyp, el birinshiliginiń bastalýymen quttyqtady.
Jarysqa elimizdiń 16 oblysy men respýblıkalyq mańyzy bar qalalarynan barlyǵy 183 sportshy qatysýda.
Sportshy qyzdar arasynda 13 salmaq dárejesinde, jasóspirimder arasynda 14 salmaq dárejesinde synǵa túsedi.
Mańǵystaý oblysynan 7 boksshy qyzymyz óńir namysyn qorǵaıdy. Atap aıtqanda 48 kelide Kórkem Berikqyzy men Sabına Sarsenhodjaeva, 50 kelide Aıbegim Kajımýhan, 70 kelide Aıgerim Egder men Aqjúnis Jaqsylyq, 63 kelide Aıaýlym Esbosynova men Asem Tańatar qatysady.
Oblystyq boks federatsııasynyń atqarýshy dırektory Jandarbek Isanovtyń aıtýynsha, Mańǵystaý óńirinde bokstan qyzdar arasynda el chempıonaty alǵash ret uıymdastyrylyp otyr.
- Buǵan deıin eresekter, jastar men jasóspirimder arasyndaǵy el birinshilikteri ótkenimen qyzdar arasyndaǵy jarys tuńǵysh ótýde. Onyń basty sebebi bizdiń oblysta qyzdar boksy endi ǵana damý ústinde. Buryn tek Janna Baskaeva ǵana el chempıony atanǵan bolsa, sońǵy jyldary úmit artatyn qyzdarymyz shyǵa bastady. Sonyń bir aıǵaǵy retinde Ásem Tańatardyń Dýbaıda ótken Azııa chempıonatynda jáne Parıjde ótken dúnıejúzilik gımnazııadada kúmis júldeger atanýy. Osy jarystan 2-3 júlde kútemiz, sonyń biri altyn bolsa eken degen úmitimiz bar, dedi Jandarbek Isanov.
12 shilde kúni bastalǵan jarys 17 shildege deıin jalǵasady.
