Aqtaýda KVN-nyń burynǵy oıynshysyn pyshaqtap ketti
ASTANA. QazAqparat - Aqtóbeniń Kóńildi jáne tapqyrlar klýbynyń burynǵy múshesi Danııar Álimbaevty Aqtaýda óltirip ketti, dep habarlaıdy QazAqparat Lada.kz saıtyna silteme jasap.
Málim bolǵandaı, D.Álimbaevty 21 shildege qaraǵan túni pyshaqtap ketken. Ol eki sanyna salynǵan jaraqat saldarynan kóz jumdy.
Oqıǵa saǵat 03.30 shamasynda 6-shaǵyn aýdandaǵy kóńil kóterý oryndarynyń birinde bolǵan.
«Túnde óte aýyr jaǵdaıda eki aıaǵy jaraqattanǵan er adam jetkizildi. Bir aıaǵynda kúretamyr men joǵary kóktamyrlaryna zaqym kelgen. Oǵan shuǵyl túrde ota jasaldy, keıin ol jansaqtaý bólimine aýystyryldy», - dedi Mańǵystaý oblystyq aýrýhanasynyń qabyldaý bóliminde.
Qaıǵyly oqıǵanyń mán-jaıyn KVN-nyń burynǵy múshesiniń dostary aıtyp berdi.
«Túnde dámhana janynda tóbeles boldy. Danııar shette turǵan edi. Biraq aradaǵy bireý onyń aıaǵyna pyshaq salyp aldy. Aýrýhanaǵa jetkizilgenimen, ómirin saqtap qala almady. Ol kóp qan joǵaltty», - dedi kóz jumǵan er adamnyń dosy.
«Atalmysh fakti boıynsha QR QK-niń 99-baby 1-bóligi (Adam óltirý) boıynsha sotqa deıingi tergep-tekserý amaldary júrgizilýde. Sot-medıtsınalyq saraptamalar taǵaıyndaldy. Kúdiktiler ustaldy. Úsheýi de Aqtaý turǵyndary», - dep habarlady Mańǵystaý oblystyq Іshki ister departamentiniń baspasóz qyzmetinen.
Qaza bolǵan 32 jastaǵy Danııar Álimbaevtyń artynda áıeli men tórt balasy qaldy. Ol Aqtóbeniń KVN-nan qurama komandasynyń burynǵy múshesi. Sondaı-aq Sochıdegi festıvalda mańǵystaýlyq KVN oıynshylarymen birge Batys Qazaqstannyń quramasynda boldy.
