Aqtaýda KVI naýqastary azaıyp, provızorlyq statsıonar jumysyn toqtatty

NUR-SULTAN. QazAqparat – Mańǵystaý oblysynyń ákimi Serikbaı Trumov Úkimet otyrysynda óńirdegi koronavırýspen kúres sharalaryn baıandady, dep habarlaıdy QazAqparat.

«Oblysta koronavırýs ınfektsııasy jaǵdaıy boıynsha resmı 2743 adam tirkeldi. Sońǵy táýlikte 44 jaǵdaı tirkelip, aýrýdyń táýliktik ósý qarqyny 1,6% qurady. Bul karantındik shekteýler arqasynda juǵýdyń eki ese tómendegenin kórsetedi. 1898 adam nemese 70,3% emdelip shyqty», - dep atap ótti S. Trumov.

Shilde aıynda pnevmonııamen aýyrǵandar sany 1431-ge jetse, qazir bul kórsetkish 56 paıyzǵa tómendep, 657 adam em alyp jatyr.

«Aqtaý qalasyndaǵy №1 júz oryndyq provızorlyq statsıonar jumysy toqtatyldy. Sebebi adam sany azaıdy. Bul tósek-oryndar kez-kelgen ýaqytta paıdalaný úshin rezervte saqtalady. Qazirgi ýaqytta 1561 tósek-oryn bar, onyń tolymdylyǵy 53% quraıdy», - deıdi oblys basshysy.

Jedel járdem shaqyrtýlardyń sany 45% - paıyzǵa tómendedi, onyń ishinde pnevmonııa boıynsha shaqyrtýlar shamamen 3 esege azaıdy.

«Medıtsınalyq qural jabdyqtarmen qamtamasyz etý boıynsha oblysta 218 ókpeni jasandy tynystandyrý apparaty bar, onyń 121-i koronovırýs ınfektsııasymen aýyratyn naýqastardy emdeýge tartyldy. Koronavırýstyq ınfektsııamen kúreste 336 dana ottegi kontsentratory jumys isteıdi. Óńirdegi densaýlyq saqtaý uıymdarynda kıslorodtyq stantsııalardy qurýǵa 7 nysan josparlandy. Qazir oblystyq rezervten 24 mln teńge bólinip, bul jumystar bastalyp ketti», - deıdi óńir ákimi.