Aqtaýda qurylys kompanııasy kópqabatty úı qurylysyn zańsyz bastap ketken

AQTAÝ. QazAqparat – Aqtaýda tıisti qujattardy rásimdemesten kópqabatty úı salýǵa kirisip ketken qurylys kompanııasyna shara qoldanyldy, dep habarlaıdy QazAqparat tilshisi.

Mańǵystaý oblysynyń Memlekettik sáýlet-qurylysyn baqylaý basqarmasy jyl basynan jospardan tys 47 tekserý jumystaryn júrgizgen. Olardyń barysynda qurylys kompanııasy tıisti ruqsatnama qujattaryn rásimdemesten Prımorskıı turǵyn alabynda úı irgetasyn ornalastyrý úshin jer qazý jumystaryn júrgizgeni belgili bolǵan. Osy máselege baılanysty qurylys kompanııasyna hattama toltyryp, aıyppul salyndy. Óz kinásin tolyq moıyndaǵan kásipker jer ýchaskesin bastapqy qalpyna keltirýge kelisti.

«Qurylysshylar kóppáterli turǵyn úılerdiń qurylys-montajdaý jumystaryn júrgizip bolǵannan keıin ǵana tıisti ruqsat qujattaryn rásimdeýge kóshedi. Júıesizdikke jol bergen qurylys kompanııalarynyń biri - «Global Sonstruction BI» JShS. Kompanııaǵa ákimshilik jazalaý sharalary qabyldandy. Sonymen qatar jer ýchaskesin bastapqy jaı-kúıine keltirý týraly nusqama berildi, - dedi qala qurylysyn baqylaý bóliminiń basshysy Nurbol Jolanbekov.

«Global construction BI» JShS dırektory Erlan Saǵıdanov hattamaǵa sáıkes qaıta kómý jumystaryn júrgizip, jerdi bastapqy qalpyna keltiretinin aıtty.

«Prımorskıı» turǵyn alaby, Maıskaıa kóshesi, №1 jer teliminde qurylys nysanynyń irgetasyn qalaý úshin qazý jumystaryn júrgizdik. Alaıda 2023 jyly 31 naýryzda «Aqtaý qalalyq sáýlet jáne qala qurylysy bólimi» MM-nen hat kelip tústi. Hattamada qurylys-montajdaý jumystaryn júrgizý barysynda zańsyzdyqtar anyqtalǵany málimdelgen. Hattamaǵa sáıkes qaıta kómý jumystary júrgizilip jatyr. Shama kelgenshe jyldamdatýdy kózdep otyrmyz», - dedi Erlan Saǵıdanov.