Aqtaýda kúnine 8 myńǵa jýyq maska tigiledi

AQTAÝ. QazAqparat - Aqtaý qalasynda tiginshi kásipkerler men eriktilerdiń jumylýymen kún saıyn segiz myń danaǵa jýyq betperde tigiledi, dep habarlaıdy QazAqparat tilshisi.

Atap aıtsaq, «Jamal-aı» JShS-nyń 10-ǵa jýyq tigin tsehy, «Shýaǵyńdy shash» qoǵamdyq qorynyń mamandary belsendilik tanytýda. Budan bólek, volonterler de bar. Máselen, kópbalaly analar, jastar, mádenıet qyzmetkerleri, balabaqsha men mektep ustazdary óz qoldarynan kelgenshe kómek kórsetýde.

Tigilgen betperdeler kún saıyn áleýmettik osal toptaǵy otbasylarǵa, múgedekterge, saýda ortalyqtaryna, «Asar-s» bazaryna, «Dına» gıpermarketine, qoǵamdyq kólikterdegi turǵyndarǵa tegin taratylady. Odan bólek, kún saıyn qaladaǵy 2-47A, 6-36, 8-9, 13-5B-1B, 5-7, 28A-1, 32B-22, 12-19, 28 sh/a «Aqjelken» mekenjaılaryndaǵy dárihanalarǵa jetkiziledi.