Aqtaýda Qulsarydan kóshirilgen turǵyndardy qonystandyrýǵa 500 oryndyq jataqhana daıyndaldy

AQTAÝ. KAZINFORM - Atyraýda sý tasqynynan Mańǵystaý oblysyna evakýatsııalanǵan jandarǵa Aqtaý tehnologııalyq qyzmet kórsetý kolledji 500 oryndy jataqhana daıyndady. 

Mańǵystaýlyqtar Qulsary qalasynda bolǵan tabıǵı apatqa baılanysty evakýatsııalanǵan azamattarǵa arnaıy kómek kórsetip, jataqhanamen qamtamasyz etip jatyr.

Óńirlik qoǵamdyq kommýnıkatsııa ortalyǵynyń málimetinshe, Aqtaýdaǵy kolledj jataqanasy 500 orynǵa arnalǵan, ár bólmede 2-3 adamǵa tósek oryn jabdyqtalǵan. Búgin túske deıin munda 15-ke jýyq otbasy ornalystyryldy.

«Elimizdiń óńirlerindegi sý tasqynyna baılanysty 500 orynǵa arnalǵan jataqana tolyqtaı daıyn. Ár bólmede jýynatyn bólme, jatyn oryn túgeldeı bar. Búgin tańnan beri adamdar kelip jatyr. Sonymen qosa, 5 balaly 1 januıa tirkeldi. Barsha muqtaj jandarǵa esigimiz ashyq. Kóshirilgen halyq adam sanyna baılanysty arnaıy túski jáne keshki aspen qamtamasyz etiledi. Sondaı-aq apattyq jaǵdaıdan evakýatsııalanǵan jandardyń kóbisi aǵaıyn-týystarynyń kómegine júginýde. Biraq oǵan qaramastan kómekke muqtaj jandarǵa esigimiz árdaıym ashyq», - dedi Aqtaý tehnologııalyq qyzmet kórsetý kolledjiniń basshysy Abdýllaev Kadyrbek.

Búgin jataqhanaǵa ornalasqan Qulsary qalasynyń turǵyny Jensekbaeva Gúljan sý tasqynyna qatysty jaǵdaı týraly aıtty.

«5 sáýirde bolǵan jaǵdaıǵa baılanysty sý tasqynan evakýatsııalanǵandardyń birimin. Múldem kútpegen jaǵdaı boldy. Úıden tek balalarymdy alyp shyqtym. Kólikke joldasym ekeýimiz 5 balamen otyrdyq. Bar oıymyz Aqtaý qalasyna aman-esen jetý boldy. Jolda Mańǵystaý óńiriniń azamattary barynsha kómek kórsetti. Barshalaryńyzǵa alǵysym sheksiz», - dedi Gúljan Jensekbaeva.

Sondaı-aq Aqtaýdaǵy Yessenov ýnıversıtetiniń stýdenttik jataqhanasyna 130 adamdy ornalastyrýǵa laıyqtalyp otyr.

Qazir atalǵan jataqhanada 30 stýdent turady. Sondyqtan júzge jýyq adamdy qabyldaýǵa daıyn ekeni málim boldy.

«Tórt qabatty jataqhana ǵımaratynda bos oryndar bar. Ár bólmede qajetti jabdyqtar qoljetimdi, taza tósek-oryn daıyndaldy, jýynatyn bólmeler, al birinshi qabatta úlken as úı bar», - dedi Yessenov ýnıversıtetiniń atqarýshy vıtse-prezıdenti Ermek Nurmaǵambet.

Stýdentter qataryndaǵy eriktiler zattardy tasymaldaýǵa, evakýatsııalanǵandardy ornalastyrýǵa kómektesedi.

«Kómekke belsendi jastar atsalysyp jatyr. Erikti jastar kómekke daıyn ekenin jetkizip, yntalaryn bildirýde. Osyǵan baılanysty, arnaıy shtab qurylyp, 120- ǵa jýyq belsendi azamattar qazirgi tańda eriktiler qatarynda kómek kórsetýde», - dep atap ótti oblystyq jastar saıasaty basqarmasynyń basshysy Muqash Oralbaı.