Aqtaýda qulaǵan kireberis mańdaıshasynyń astynda qalǵan jumysshylardyń jaǵdaıy qalaı

AQTAÝ. QazAqparat - Aqtaýda úıdiń kireberis mańdaıshasynyń qulaýynan zardap shekken jumysshylardyń jaǵdaıy birqalypty, dep habarlaıdy QazAqparat tilshisi.

Zardap shekkkenderdiń biri - 1975 jyly týǵan azamat, ol tobyǵynan soqqy alǵan.

Dárigerlik tekseristen soń ambýlatorlyq em qabyldaýǵa jiberilgen.

Al sol jaq baltyry synǵan ekinshi naýqasqa ota jasalǵan. Qazirgi ýaqytta eki naýqastyń da jaǵdaıy turaqty.

«Ekinshi naýqas travmatologııa bólimine jatqyzyldy. Onyń baltyr súıeginiń tómengi jaǵynyń úshten bir bóligi ashyq synǵan. Operatsııa jasaldy. Qazir bólimshede em qabyldap jatyr. Ómirine qaýip joq», - dedi Mańǵystaý oblystyq aýrýhanasy qabyldaý bóliminiń qyzmetkeri Qaırat Nuralıev.

Aıta ketsek, Aqtaýda 9 shaǵynaýdandaǵy turǵyn úıdiń kireberisiniń mańdaıshasy qulap, jumys jasap jatqan 2 adam zardap shegip, bireýi qaza tapqan edi.

Keıinirek turǵyn úı mańdaıshasynyń josparly jóndeý jumystaryn júrgizý kezinde qulaǵany belgili boldy.