Aqtaýda kúdikti avtokólikti aıdap ketpek bolǵan jerinen qolǵa tústi

AQTAÝ. QazAqparat - Aqtaýda kúdikti avtokólikti aıdap ketpek bolǵan jerinen qolǵa tústi, dep habarlaıdy QazAqparat tilshisi.

QR Ulttyq ulanynyń baspasóz qyzmetinen túsken málimetke qaraǵanda, oqıǵa keshe tańǵy saǵat 08.00-der shamasynda bolǵan.

Ulttyq ulan ofıtseri úıinen shyǵa bergende, kólikte jan-jaǵyna alańdap otyrǵan azamatty baıqaıdy.

Maıor Baqtııar Qaldybekov bul jerde bir «gáp» baryn sezindi. Óıtkeni ol kólik ıesin jaqsy biletin.

Ulttyq ulan ofıtseri kólikke jaqyndap, ishtegi adamdy shaqyrǵany sol edi, ol ekinshi esikten shyǵyp, qasha jóneldi.

Osyǵan kýá bolǵan taǵy bir kórshi kúdiktiniń ustalýyna kómektesti. Qarsylyq tanytqanyna qaramastan, kúdikti qolǵa túsip, polıtsııaǵa tapsyryldy.

Keıin belgili bolǵanyndaı, ol buǵan deıin de isti bolyp, izdeýde júrgen turǵyn ekendigi anyqtaldy.