Aqtaýda qubyr jarylyp, turǵyndar aýyz sýsyz qaldy

AQTAÝ. KAZINFORM – Oqıǵa 8-shaǵyn aýdan 14-úıdiń janynda bolǵan. Magıstraldy aýyz sý qubyrynan aqaý shyǵyp, birneshe úıge sý berý toqtatyldy. 

Sondaı-aq 7, 9, 14 jáne 15-shaǵyn aýdandarda aýyz sýdyń qysymy tómendetilgen. Bul týraly turǵyndar aımaq basshysynyń Telegram chatynda jarysa jazyp, shaǵymdanýda.

- Aýyz sýsyz qaldyq. 23-naýryz kúni keshke óshirdi. Búgin áli sý joq. Dúkennen satyp alýǵa týra kelip tur, - deıdi turǵyndardyń biri. 

Al, Kaspıı jylý, sý arnasy mekemesiniń basshylyǵy barlyq kúsh kesheden beri qubyrdy jóndeýge jumyldyrylǵanyn, jaqyn arada qaıta iske qosylatynyn habarlady. 

- 23 naýryz kúni saǵat 21.00 shamasynda dıspetcherlik qyzmetke 8-shaǵyn aýdan turǵyndarynan sýdyń joqtyǵy týraly shaǵymdar tústi. Tekserý barysynda 8-shaǵyn aýdannyń 14-úıiniń janynda dıametri 225 aýyz sýdyń magıstraldyq qubyrynan aqaý anyqtaldy. Apatty joıý úshin barlyq qajetti tehnıka jumyldyryldy. Jóndeý jumystary shamamen saǵat 18.00-ge deıin jalǵasady, - deıdi "Kaspıı jylý, sý arnasy" MKK dırektorynyń orynbasary Erjan Jeńisuly.

Buǵan deıin, Aqtaýda tolassyz jańbyr jaýyp, kóshelerdi sý basyp jatqany týraly jazǵan bolatynbyz.