Aqtaýda kórkem gımnastıkadan halyqaralyq týrnır ótip jatyr
AQTAÝ. QazAqparat - 1-5 tamyz aralyǵynda Mańǵystaý oblysynda kórkem gımnastıkadan ІІ halyqaralyq «Shaǵala» týrnıri ótip jatyr, dep habarlaıdy QazAqparat mangystaumedia.kz-ke silteme jasap.
Saıysqa Ózbekstan, Grýzııa, Izraılden 6-15 jas aralyǵyndaǵy (2003-2012 jyldary týǵan) gımnasshy qyzdar qatysýda. Óz elimizden Almaty, Shymkent jáne Atyraý oblysy gımnasshylary da baq synaýda. Týrnırge barlyǵy 250-deı sportshy qatysady. Mańǵystaý oblysynyń namysyn 60 gımnasshy qorǵaıdy.
Oblystyq kórkem jáne estetıkalyq gımnastıka federatsııasy jarys aldynda shetelden maman shaqyryp, óńirdiń jas sportshylarynyń daıyndyǵyn pysyqtaǵan. Olarǵa Izraılden kelgen kórkem gımnastıkadan halyqaralyq dárejedegi tóreshi, Keńes odaǵynyń 13 dúrkin chempıony Venera Zarıpova baǵyt kórsetip, tálim bergen.
Federatsııa ókilderi kórkem gımnastıkaǵa qyzyǵýshylar sanynyń artyp kele jatqanyn alǵa tartady. Mamandar bul oraıda jattyǵatyn orynnyń tapshylyǵyna toqtaldy.
«Bul sportqa keletin qyzdar óte kóp. Sondyqtan zalǵa syımaı jatady. Aýdandardan da gımnastıkaǵa qyzyǵyp, balalaryn ákeletinder bar. Tańerteńnen keshki 8-ge deıin jattyǵamyz. Bizge gımnastıkaǵa arnalǵan zal jetispeıdi. Toptardy kezek-kezek, birinen soń birin shaqyryp, jattyǵamyz», - deıdi MO kórkem gımnastıkadan aǵa jattyqtyrýshy Bıbigúl Ernazarova.
«Jyldyń basynda sporttyq gımnastıkaǵa arnalǵan sport zal ashyldy. 20 jyl tóńireginde bizde mundaı ǵımarat bolmaǵan. Aldaǵy ýaqytta bul sport túri damyp, chempıondar kóbeıedi degen oıdamyz. Bir jyldyń ishinde oblysta 11 sporttyq keshen salyndy. Sportpen shuǵyldanatyn turǵyndar sany 45 myńǵa artty. Sondyqtan bul másele de aldaǵy ýaqytta sheshimin tabady degen oıdamyz», - dedi osy máselege jaýap bergen oblystyq sport basqarmasy basshysynyń m.a. Nurbek Qarabalaev.
