Aqtaýda kópqabatty úıdiń ishki plıtalary opyrylyp tústi

AQTAÝ. QazAqparat – Mańǵystaý oblystyq memlekettik qurylys-sáýlet baqylaý basqarmasy Aqtaý qalasynda salynyp jatqan úıdiń qabataralyq plıtalarynyń qulaýyna qatysty málimet berdi, dep habarlaıdy QazAqparat tilshisi.

«Qurylys nysany Aqtaý qalasynyń 29A shaǵyn aýdanyndaǵy №130/9, №130/13, №130/14 jer ýchaskelerinde ornalasqan. Qurylys nysanyn salýshy - «Caspian Mega Construction» JShS». Atalǵan nysanǵa qatysty sáýlet-jobalaý tapsyrmasy, kelisilgen úlgilik jobasy, jumys jobasyna jeke saraptamanyń oń qorytyndysy jáne qurylys-montajdaý jumystarynyń bastalǵany týraly habarlamasy bar. «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» Zańnyń 68-babyna sáıkes qurylys kezinde negizgi talaptar saqtalǵan», - dep atap ótedi basqarmadan.

Vedomstvonyń málimetinshe, oqıǵa ornyna barǵan oblystyń bas memlekettik qurylys ınspektory oryndalǵan qurylys-montajdaý jumystarynyń sáıkestigine, paıdalanylǵan materıaldardyń, buıymdardyń sapasyna tekserý júrgizý týraly sheshim qabyldaǵan. Sebebi nysanǵa sapasyz materıaldar qoldanylyp, qurylys-montajdaý jumystary zań buzýshylyqtarmen júrgizilgen bolýy yqtımal.

«Sonymen qatar oqıǵanyń eki kún buryn oryn alǵanyn habarlaımyz. Degenmen, búginge deıin tehnıkalyq qadaǵalaýdan aqparat kelip túsken joq», - dedi basqarmadan.

Áleýmettik jelide taraǵan vıdeoda er adam qulaǵan plıtanyń astynda qujattary men zattary qalǵanyn aıtady.

«Mynaý meniń jatqan jerim. Qujattarym, barlyq zattarym osy jerde edi. Beton qulady, esh zatym qalmady. Qudaıdyń ózi jar boldy, qazir ǵana osynyń astynan jumysqa shyǵyp ketip edim», - dedi jumysshy.