Aqtaýda kópqabatty úılerdiń shatyryndaǵy apatty qurylystar buzylyp jatyr
AQTAÝ. KAZINFORM — Aqtaýda kópqabatty turǵyn úılerdiń shatyrlaryna ornatylǵan beton plıtalar alynyp jatyr. Óıtkeni, kezinde ǵımarattyń sáni úshin salynǵan birneshe tonnalyq beton plıtalar úgitilip, tómenge qulap, turǵyndardyń ómirine qaýip tóndirýde.
Osyǵan baılanysty qaladaǵy 10 turǵyn úıdiń shatyrynda ornalasqan avarııalyq jaǵdaıdaǵy beton plıtalar buzylyp, alynyp jatyr.
— Qazirgi tańda jumystar 5-shaǵyn aýdandaǵy 1-úıde jasalyp jatyr. Josparǵa sáıkes merdiger mekeme eski beton plıtalardy demontajdap, turǵyndar úshin qaýipsiz orta qalyptastyrady. Aldaǵy ýaqytta osyndaı jumystar 7-22, 8-8, 27-5, 26-38, 1-35, 9-30, 4-5, 14-47 jáne 12-53 mekenjaılarynda jalǵasady, — dep habarlaıdy Aqtaý qalasy ákimdiginiń baspasóz qyzmeti.
Aıta keteıik, bul másele turǵyndardy kóp jyldan beri mazalap keledi. Olar qala ákimdigine birneshe ret shaǵymdanǵan bolatyn.
— Qazirgi tańda merdiger mekeme tarapynan jumystar sapaly ári júıeli túrde júrgizilip jatyr. Qaýipsizdik máselesine erekshe nazar aýdarylyp, tıisti sharalar qolǵa alynǵan. Turǵyndarǵa ýaqytyly habarlandyrý berilip, jumystardyń barysy turaqty túrde túsindirilip turady. Máseleniń oń sheshim tabýyna qoldaý kórsetip, onyń túbegeıli sheshilýine atsalysqan qala ákimine rızashylyǵymyzdy bildiremiz, — deıdi qala turǵyny Kırıll Osın.
Buǵan deıin, Aqtaýda teńiz jaǵalaýynda zańsyz qurylys anyqtaldy.
