Aqtaýda kópqabatty eki úıdiń ortasyndaǵy qýysqa túsip ketken bala aýrýhanadan shyǵaryldy

Aqtaýda turǵyn úıdiń 8-qabatynan qulap, kópqabatty eki úıdiń ortasyndaǵy qýysqa túsip ketken bala aýrýhanadan shyǵaryldy. Bul týraly Mańǵystaý oblystyq densaýlyq saqtaý basqarmasynyń baspasóz qyzmetinen málim etti, dep habarlaıdy QazAqparat tilshisi. 

 Oqıǵa 8 qyrkúıek kúni saǵat 22.45-te 16 shaǵynaýdanda 59-úıinde bolǵanyn jazǵan edik.

«Balanyń jaǵdaıyn tolyq tekserý nátıjesinde jasóspirimniń 3-shi dárejeli travmatıkalyq shok alǵany anyqtaldy. Sanasy mı komasynyń 2-shi dárejesinde boldy, kóziniń qarashyǵy keńeıgen. Jedel túrde jasandy tynys alý apparatyna qosyp, shokqa qarsy terapııany bastadyq»,-dedi Mańǵystaý oblystyq kópbeıindi balalar aýrýhanasy reanımatsııa jáne qarqyndy terapııa bólimiń meńgerýshisi Mereke Bekbaev.

Dárigerler tolyq tekseris júrgizip, basyn, ókpesin, bel tusyn kompıýterlik tomografııaǵa túsirdi. Іsh qurylysyna ýltra dybystyq zertteý júrgizildi. Balanyń jabyq bas mı jaraqaty, bel omyrtqasynyń syný dıagnozy qoıyldy.

«2 kúnnen soń bala mı komasynan shyqty. Balanyń tynys alýy qalpyna kelgen soń apparatty óshirdik. Ózi demala bastady, sanasy aıqyn kúıde. Reanımatsııadan hırýrgııa bólimine aýystyrdyq. Balaǵa eshqandaı ota jasalǵan joq», - dedi Mereke Bekbaev.

Jasóspirimniń jedel túrde emin júrgizip, aman qalýyna reanımatologtar, hırýrgtar, neırohırýrgtar, medbıkeler atsalysqan. 17 jastaǵy jasóspirim úıine shyǵaryldy. Aldaǵy ýaqytta ońaltý ortalyǵynda reabılıtatsııalyq sharalar júrgizilip, dárigerlerdiń turaqty baqylaýynda bolady.