Aqtaýda kópbalaly otbasylar baspanaly boldy

AQTAÝ. QazAqparat - El Táýelsizdiginiń 30 jyldyǵy merekesi tusynda Aqtaýdaǵy 53 kópbalaly otbasyǵa «Nurly jer» memlekettik baǵdarlamasy aıasynda jańa páter kiltteri tabystaldy, dep habarlaıdy QazAqparat.

Aqtaý qalasy ákiminiń baspasóz qyzmetinen málim etkendeı, 2 bólmeli arendalyq páterler oblys ortalyǵynda jańadan boı kótergen 19 shaǵynaýdannan berildi.

«Búgin bárimiz úshin de úlken ári qýanyshty oqıǵa. Elimiz Táýelsizdigin alǵaly halyqty baspanamen qamtýdyń birneshe baǵdarlamasy jasaldy. Úı alýdyń jańa múmkindikteri qarastyryldy. Osylaısha myńdaǵan otbasy qonys toıyn toılady. Elbasynyń árbir qazaqstandyq memleket qamqorlyǵyn sezinýi tıis degen bastamasyn búginde Memleket basshysy sátti jalǵastyryp keledi.

Mine búgin taǵy birneshe otbasynyń qýanyshyna kýá bolyp turmyz. Búgingi jaldamaly baspana jekeshelendirýge jatpaıdy. Aı saıyn zańmen belgilengen mólsherde az soma tóleıdi. Jańa shańyraqtaryńyz shattyqqa toly bolsyn», - dedi baspana kiltterin tabystaǵan qala ákiminiń orynbasary Ábilqaıyr Baıpaqov.

Kópbalaly otbasyn baspanamen qamtamasyz etý úshin memleket qazynasynan 790 mln teńge qarajat bólindi. Osy maqsatta qala ákimdigi kásipkerlik sýbektisine jatpaıtyn jeke tulǵalardan 53 turǵyn úı satyp alyp, 2003 jyldan 2013 jylǵa deıingi «Turǵyn úı qatynastary týraly» Qazaqstan Respýblıkasynyń zańyna sáıkes kezekte turǵan turmysy tómen 7 kópbalaly otbasyǵa tabystaldy.

Qalǵan páterler úshin qabyldanǵan qujattardy tekserý jumystary júrgizilýde.