Aqtaýda konteınerlik hab qurylady – mınıstrlik
Indýstrııa jáne ınfraqurylymdyq damý mınıstrliginiń málimetinshe, bul oqıǵa Transkaspıı halyqaralyq kólik marshrýty boıynsha júk tasymalyn damytýdy maqsat etedi. Investor retinde PSA Group, Maersk, MSC syndy álemdik konteınerlik operatorlardy tartý kózdelip otyr.
«Búginge deıin Arnaıy ekonomıkalyq aımaqta 18 joba júzege asyryldy. Sondaı-aq taǵy 25 joba iske asyrylý kezeńinde. Jalpy alǵanda, ekonomıkalyq aımaqtaǵy qolǵa alynǵan jumystardyń basym baǵyty munaı óndirý men munaı-hımııa ónerkásibi, qurylys, port jáne týrıstik salalardy damytýǵa arnalǵan. AEA qurylǵannan beri 1 720 turaqty jumys orny ashyldy», - dedi vedomstvodan.
Mınıstrlik habarlamasynda 19 jyldan beri AEA aýmaǵyndaǵy iske asyrylǵan jobalarǵa ınvestorlar tarapynan 260,7 mlrd teńge salynǵany da jazylǵan. Al sheteldik ınvestıtsııa kólemi 168 mlrd teńgeni quraıdy.
Aıta keterligi, «Aqtaý teńiz porty» AEA-da jobalardy júzege asyrýǵa tolyqqandy jaǵdaı jasalǵan. Aımaqqa qajetti ınfraqurylym júrgizilip, salyqtyq jáne kedendik preferentsııalar usynylǵan. Sondaı-aq jobalardy súıemeldeý men olardyń monıtorıngi iske asyrylady.
