Aqtaýda kólik keptelisine tap bolǵan júrgizýshiniń biri ekinshisin pyshaqtap ketken
ASTANA. QazAqparat - Aqtaý qalalyq sotynda sottalýshy E.-ge qatysty qylmystyq is qaraldy, dep habarlaıdy mng.sud.kz .
Sot otyrysynda anyqtalǵandaı, sottalýshy E., Aqtaý qalasyndaǵy 13 shaǵynaýdanda kólik basqaryp kele jatyp, kepteliske tap bolǵan. Saldarynan eki júrgizýshiniń arasynda janjal týyndap, sońy tóbeleske ulasqan. E. óziniń avtokóliginen pyshaq alyp shyǵyp, jábirlenýshi D.-nyń ishine suqqan. Ol jerge qulaǵan kezde oqıǵa bolǵan jerden izin sýytqan.
Aqtaý qalalyq sotynyń úkimimen E. QR QK-niń 106-babynyń 1-bóligimen (densaýlyqqa qasaqana aýyr zııan keltirý) kináli dep tanylyp, 4 jyl merzimge bas bostandyǵynan shekteý jazasy taǵaıyndalyp, oǵan taǵaıyndalǵan merzimge probatsııalyq baqylaý belgilendi.
Sottyń úkimi zańdy kúshine engen joq.
