Aqtaýda kólik apatynan eki júkti kelinshek zardap shekti

AQTAÝ. QazAqparat – Jol apaty 23 jeltoqsanda kúnniń alǵashqy jartysynda Aqtaýdyń 26-shy shaǵyn aýdanynda kóp profıldi oblystyq balalar aýrýhanasynyń mańynda bolǵan, dep habarlaıdy «QazAqparat» HAA Lada.kz saıtyna silteme jasap.

Aımaqtyń polıtsııa departamenti men densaýlyq saqtaý basqarmasynyń baspasóz qyzmeti mán-jaıdy tolyǵyraq habarlady.

Belgili bolǵandaı, «Lexus» markaly kóliktiń júrgizýshisi ekinshi joldan shyǵyp ketip, osy ýaqytta sol jolaqta qatar kele jatqan «Kia» jeńil kóligine jol bermegen. Osylaısha eki kólik soqtyǵysyp qalǵan.

Jol kólik oqıǵasynyń saldarynan Kia kóligindegi eki júkti kelinshek zardap shekken.

Jedel járdem toby olardy aýrýhanaǵa jetkizdi. 1979 jyly týǵan kelinshek júktiliktiń 33-34-shi aptasynda, dárigerler onyń jambas jaraqatyn alǵanyn anyqtady. Ekinshisi 1988 jyly týǵan, júktiliktiń 22-23-shi aptasynda, keýde qýysyn jaralap alǵan.

«Atalǵan fakti boıynsha Lexus júrgizýshisine qatysty QR Ákimshilik quqyq buzýshylyq týraly kodeksiniń 610-baby boıynsha ákimshilik hattama toltyryldy. Osy baptyń sanktsııasy aıyppul tóleýdi nemese júrgizýshi quqyǵynan aıyrýdy qarastyrady. Kólik aıyppul turaǵyna qoıyldy», - dep atap ótti vedomstvo ókilderi.

Eske salaıyq, 13 jeltoqsanda tústen keıin Mańǵystaýda bolǵan jol apatynan júktiliktiń 23-24 aptalarynda bolǵan eki júkti kelinshek zardap shekken bolatyn. Birinshisi jabyq mı jaraqatyn alyp, Mańǵystaý oblystyq aýrýhanasyna jetkizildi. Ekinshi jábirlenýshi sıtýatsııalyq nevroz alǵan. Ol aýrýhanaǵa jatýdan bas tartty.