Aqtaýda qoqys arasynan jańa týǵan sábıdiń denesi tabyldy
ASTANA. QazAqparat - Aqtaýlyq polıtseıler qoqys arasynan óli kúıinde tabylǵan shaqalaqtyń anasyn izdestirip jatyr. Náresteniń denesin qaladan 20 shaqyrym qashyqtyqta ornalasqan kúl-qoqys polıgonynyń qyzmetkerleri taýyp alyp, tıisti oryndarǵa habar bergen, dep jazady KTK.
Arnaıy kóliktiń júrgizýshisi Berdáýlet Kemalov qaladaǵy qoqys konteınerlerindegi turmystyq qaldyqtardy ádettegisinshe tıep, qala syrtyna ákep tókken. Al, bóbektiń jansyz denesin sonda qoqys suryptap júrgenderdiń biri taýyp alypty. Qazir tártip saqshylary jańa týǵan sábıdi kimniń, qaı jáshikke tastaǵandyǵyn anyqtaýmen aınalysyp jatyr. «Adam ólimi» baby boıynsha qylmystyq is te qozǵalyp, sot-medıtsınalyq saraptama taǵaıyndaldy.
«Deneni bótelke jınaıtyn kelinshektiń bireýi taýyp alǵan. Sóıtip polıtsııaǵa habar bergen. Sosyn erteńine polıtsııaǵa baryp tapqan jerimdi kórsetti», - deıdi kólik júrgizýshisi Berdáýlet Kemalov.
