Aqtaýda qoqys shyǵarýshy kompanııalarǵa turǵyndardan shaǵym kóp
Aqtaýda qoqys shyǵarýshy 8 kompanııa bar. Turǵyndar tarapynan qoqystyń ýaqytyly shyǵarylmaýyna baılanysty olarǵa shaǵym kóbeıgen. Budan bylaı ýaqtyly tazalyq jumystaryn júrgizbegen komapnııalar aıyppul tóleıdi, dep habarlaıdy Kazinform.
Aqtaý qalalyq turǵyn-úı kommýnaldyq sharýashylyq bólimi qoqys shyǵarýshy kompanııalardyń ýaqtyly qoqys konteınerlerdi tazalamaýy, kútip ustamaýy týraly dáleldi materıaldardy qalalyq sanıtarlyq-epıdemıologııalyq baqylaý basqarmasyna jiberedi. Sodan keıin qoqys shyǵarýshy kompanııalarǵa aıyppul túrindegi ákimshilik jaza qoldanylmaq.
- QR Ákimshilik quqyq buzýshylyq týraly kodeksi 802-babynyń negizinde ákimshilik hattama toltyrylyp, QR Ákimshilik quqyq buzýshylyq týraly Kodeksi 425-babynyń halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý, ıaǵnı qoqysty ýaqytyly shyǵarmaý boıynsha qoqys shyǵarýshy kompanııalar 230 aılyq eseptik kórsetkish mólsherinde aıyppul tóleıdi nemese sotpen kompanııany jabýǵa deıin sheshim qabyldanady, - dedi Aqtaý qalalyq sanıtarlyq-epıdemıologııalyq baqylaý basqarmasy basshysy Asıma Jarylǵasova.
Sonymen qatar qalada kásipkerlik nysandar ózderiniń qoqystaryn turǵyndardyń qoqys konteınerine tastaý jıilegen.
- Kásipkerlik nysandar, atap aıtqanda dúken ıeleri, kafelerdiń mindetti túrde qoqys shyǵarýshy kompanııalarmen kelisimsharty bolýy kerek. Kásipkerler óz qoqystaryn turǵyndardyń qoqys konteınerine tastaýyna tyıym salynady. Kásipkerlik nysandardyń (dúken, kafe) bólek ózderiniń qoqys konteıneri bolýy kerek. Sondaı-aq qoqys shyǵarýshy kompanııalardyń konteınerleri sanıtarlyq talaptarǵa saı bolýy kerek, - dedi Aqtaý qalalyq sanıtarlyq-epıdemıologııalyq baqylaý basqarmasy basshysynyń orynbasary Laýra Ábdiǵalıeva.
Jaýaptylardyń aıtýynsha, qoqys shyǵarýmen aınalysatyn kompanııalardyń konteınerleri germetıkalyq bolýy qajet jáne qaqpaǵy bolýy kerek. Bul konteınerler bosatylǵannan keıin mindetti túrde tazalanyp, dezınfektsııalanýy kerek.
