Aqtaýda qoǵamdyq kóliktiń qatynaıtyn ýaqyty uzarady

AQTAÝ. QazAqparat - Aqtaýda jaz mezgiline baılanysty 1 shildededen bastap №2, №3 jáne №5 avtobýstardyń júrý ýaqyty keshki 22:00-ge deıin uzarady, dep habarlaıdy QazAqparat Aqtaý qalasy ákimdiginiń baspasóz qyzmetine silteme jasap.

Búginde Aqtaý qalasy boıynsha tańǵy saǵat 06:40-tan keshki 20:00-ge deıin №2, №3, №4, №4m, №5, №7 avtobýstary turaqty qyzmet kórsetedi.

Atalǵan marshrýttardyń ıntervaly keshki saǵat 20:00-ge qalypty ýaqyt aralyǵynda, ıaǵnı, №2 marshrýt úshin 12-14 mınýt, №3 marshrýt 6-8 mınýt, №5 marshrýt 14-16 mınýt aralyǵynda qatynaı beredi.

Al, saǵat keshki 20:00 men 22:00 aralyǵynda jolaýshylar aǵynynyń azaıýyn eskere otyryp, avtobýs aralyǵyndaǵy ıntervaldar №2 marshrýt úshin 18-20 mınýt, №3 marshrýt 12-14 mınýt, №5 marshrýt 20 mınýt bolady.