Aqtaýda qoǵam belsendileri stýdent jastarmen kezdesti

AQTAÝ. QazAqparat - Aqtaýda qoǵam belsendileri prezıdent saılaýynda daýys beretin jastarǵa el bolashaǵy úshin tańdaý jasaýdyń mańyzyn túsindirdi, dep habarlaıdy QazAqparat tilshisi.

Sharanyń maqsaty - jastardyń saılaýdaǵy quqyqtaryn bilýi, ony paıdalanýy, sol arqyly memleketti basqarýǵa aralasýyna yqpal etý.

Qoǵam belsendisi, «Ulttyq rýh» qoǵamdyq birlestiginiń dırektory Aıat Súgirbaı álemdik qoldanystaǵy prezıdent saılaýy uǵymyna anyqtama berip, qoǵamda qandaı tulǵalar prezıdent bola alatyny jaıly áńgimeledi. Sondaı-aq, jastar - el bolashaǵy ekenin aıta kele, olar Otan jáne ata-ana aldyndaǵy jaýapkershiligin sezine otyryp, saılaýǵa belsene qatysýy kerektigin jetkizdi.

«Aldymyzda saıası naýqan kele jatyr, soǵan bir kisideı jumyla atsalysýymyz kerek. Jastar - eń belsendi áleýmettik top bolǵandyqtan, olardyń saılaýdaǵy pikiri memleket úshin óte mańyzdy. Sondyqtan da, eldiń erteńi úshin, Otanymyzdyń bolashaǵy úshin árqaısymyz senimdi, naqty tańdaý jasaýǵa tıispiz. Biz, jastar, prezıdent saılaýynda ár azamatqa artylatyn jaýapkershilikti sezinýmiz kerek», - deıdi Aıat Súgirbaı.

Sharada prezıdent saılaýynda alǵash ret daýys beretin stýdent jastar óz oılarymen bólisti.

«Búgingi kezdesýde aldaǵy kezekten tys prezıdent saılaýynyń mańyzy jáne árbir jastyń daýysy el úshin qajet ekenin uǵyndyq. Men saılaýǵa qatysamyn jáne barlyq zamandastarymdy osy saılaýda daýys berip, óz tańdaýyn jasaýǵa shaqyramyn»,-deıdi stýdent Aınur Aıapova.

Aıta keteıik, sharaǵa qalamyzdaǵy arnaýly oqý oryndarynan 60-tan astam stýdent qatysty.