Aqtaýda qyzǵa zorlyq kórsetemin dep qorqytqan er adam 30 táýlikke qamaldy
AQTAÝ. KAZINFORM — Aqtaýda jaǵalaýda qyzǵa zorlyq kórsetemin dep qoqan-loqy jasaǵan er adam 30 táýlikke ákimshilik qamaýǵa alyndy. Tıisti sheshimdi Aqtaý qalasynyń ákimshilik quqyq buzýshylyqtar jónindegi mamandandyrylǵan soty shyǵardy.
Oqıǵa 2 tamyz kúni qala jaǵalaýynda bolǵan. Buǵan deıin áleýmettik jelide taraǵan beınejazbada er adamnyń qyzdy jibermeı ustap turǵany jáne oǵan zorlyq kórsetetinin aıtyp qorqytqany kórinedi. Oqıǵaǵa kýá bolǵan turǵyndar janjaldy toqtatýǵa áreket jasaǵan.
Sot otyrysynda quqyq buzýshy óz kinásin tolyq moıyndaǵan. Onyń kinási polıtsııa usynǵan materıaldarmen, medıtsınalyq kýálandyrý qorytyndysymen jáne oqıǵa ornyndaǵy beınejazbalarmen dáleldendi.
Sot er adamdy Qazaqstan Respýblıkasy Ákimshilik quqyq buzýshylyq týraly kodeksine sáıkes usaq buzaqylyq jasaǵany úshin kináli dep tanyp, atalǵan bap boıynsha kózdelgen eń joǵary jaza — 30 táýlikke ákimshilik qamaý túrindegi jaza taǵaıyndady.
Buǵan deıin, Astanada burynǵy áıelin ańdyǵan adam jazaǵa tartyldy.
