Aqtaýda kishkentaı balaǵa kúsh qoldanǵan tis dárigeri jumystan qýyldy

AQTAÝ. QazAqparat - Aqtaýda kishkentaı balaǵa dórekilik kórsetken tis dárigeri jumysynan bosatyldy. Bul týraly Mańǵystaý oblysynyń Óńirlik kommýnıkatsııalar qyzmetinde ótken brıfıngte oblystyq stomatologııalyq ortalyqtyń dırektory Qýat Mashyryqov málimdedi, dep habarlaıdy QazAqparat.

Qýat Mashyryqovtyń aıtýynsha, óz qyzmetin adal atqarmaǵan dárigerdiń jumysyn ary qaraı jalǵastyrýyna jol berilmeıdi.

Esterińizge sala keteıik, 1 qarasha kúni balanyń tisin julý kezinde qatty julqylap, oǵan qatygezdik tanytqan dárigerdiń vıdeosy áleýmettik jelige tarap ketken bolatyn. Balanyń anasy klınıkadaǵy beınebaqylaý kamerasyna túsken jazbany tekserýdi talap etken. Artynsha, medıtsına qyzmetkeri vıdeoúndeý jasap, óz kinásin tolyq moıyndaıtynyn, balanyń anasynan jáne qazaqstandyqtardan keshirim suraıtynyn jetkizdi.

Alaıda zardap shekken balanyń anasy birden polıtsııaǵa aryz jazǵan. Aqtaý qalalyq polıtsııa basqarmasy bastyǵynyń orynbasary Qaldymurat Aıǵaraqovtyń málimetinshe, dárigerdiń ústinen ákimshilik is qozǵaldy. Sot-medıtsınalyq saraptama taǵaıyndaldy. Jasóspirimniń denesinde jaraqat bolǵan jaǵdaıda QR ákimshilik quqyq buzý kodeksiniń 73/1 babymen, denesinde jaraqat bolmaǵan jaǵdaıda atalǵan kodekstiń 73/2 babymen uryp-soqqany úshin ákimshilik jaýapkershilikke tartylmaq.

Atalǵan derek boıynsha QR QK 141-baby boıynsha qylmystyq is qozǵaý úshin zańdy buzǵan azamat muǵalim nemese tárbıeshi bolýy kerek.

«Dáriger óte bilimdi. Jas dáriger. Minezi shapshań óte shynshyl jigit. Mektepti «Altyn belgige», al 2017 jyly M.Ospanov atyndaǵy Batys Qazaqstan memlekettik medıtsına ýnıversıtetiniń stomatologııa fakýltetin úzdik bitirgen. Sol jyly tamyz aıynda ortalyqqa jumysqa ornalasty. 2 jyl ishinde ózin jaqsy jaǵynan kórsete bildi. Bolashaǵynan mol úmit kútetin azamat dep oılaıtynbyz. Endi keshegi óreskel qylyqtaryna qarap, eńbek kodeksi 49-babynyń 5-tarmaqshasy, 56-babyna sáıkes jumystan bosatý jóninde sheshim qabyldadyq»,- dedi oblystyq stomatologııalyq ortalyqtyń dırektory Qýat Mashyryqov.

Qýat Mashyryqovtyń aıtýynsha, tis emhanasyna jaz ýaqytynda balalar óte kóp keledi.

«Qala halqynyń sany jyldan jylǵa ósýde. Biz eki mezgilde 600 adamǵa deıin qabyldaımyz. Halyq sanynyń ósýine baılanysty emhanany keńeıtý jóninde usynys berdik, bolashaqta 32-shaǵyn aýdannan jańa emhana ashpaq oıymyz bar»,- deıdi oblystyq stomotologııa ortalyǵynyń dırektory.