Aqtaýda kirister departamentiniń orynbasary paramen ustaldy

  AQTAÝ. QazAqparat - Mańǵystaý oblystyq kirister departamenti basshysy orynbasarynyń 10 mln teńge paramen ustalǵany týraly vıdeo jarııalandy, dep habarlaıdy QazAqparat tilshisi.

Áleýmettik jelide Mańǵystaý oblysy boıynsha Memlekettik kirister departamenti basshysynyń orynbasary 10 mln teńge para alyp jatqandyǵy týraly jedel túsirilimniń vıdeosy paıda boldy.

Jedel túsirilimdi QR Memlekettik qyzmet isteri jáne sybaılas jemqorlyqqa qarsy is-qımyl agenttigi Feısbýk paraqshasynda jarııalady.

Agenttik ókilderi memlekettik qyzmetshiniń kóligin tekserý kezinde qaǵaz paketten 10 mln teńge kólemindegi qarajatty tabady.

Bul oqıǵa ótken aptada tirkelgen. Agenttiktiń resmı ókiliniń aıtýynsha, ustalǵan departament basshysynyń orynbasary salyqty azaıtyp berý maqsatynda 10 mln teńge talap etken. Qazir para bergen jáne alǵan eki kúdiktiniń ústinen qylmystyq is qozǵalyp, sotqa deıingi tergeý amaldary júrip jatyr.