Aqtaýda kontrabandaǵa qatysty qylmystyq top qurǵan azamat 10 jylǵa sottaldy

ASTANA. KAZINFORM — Aqtaýda iri kontrabandanyń uıymdastyrýshysy sottaldy, dep habarlaıdy Bas kólik prokýratýrasynyń baspasóz qyzmeti.

Aqtaý qalalyq soty Qazaqstan azamatyn qylmystyq top qurǵany jáne oǵan basshylyq jasaǵany úshin 10 jylǵa bas bostandyǵynan aıyrýǵa úkim etti.

— 2016-2018 jyldar aralyǵynda adamdar toby qurylys materıaldaryn jetkizemiz degen jeleýmen Irannan Qazaqstanǵa keden shekarasy arqyly quny 1 mlrd teńgeden asatyn temeki men tabak tasymaldaǵan. Qylmystyq toptyń uıymdastyrýshysy halyqaralyq izdeýde bolyp, Ázerbaıjan Respýblıkasynan ekstradıtsııalandy. Toptyń qalǵan músheleri buǵan deıin ártúrli jazalar úshin jaýapqa tartylǵan bolatyn, — delingen vedomstvo habarlamasynda.

Sot úkimi zańdy kúshine engen joq.

Eske salsaq, buǵan deıin Aqtaýlyq turǵyndar zańsyz qorshaýdy buzdyryp, qurylys kompanııasyna shaǵym túsirgenin jazdyq.