Aqtaýda Qazaqstan men Ózbekstan óńirleri basshylary keńesiniń birinshi otyrysy ótti
ASTANA. KAZINFORM — Aqtaýda Qazaqstan Respýblıkasynyń Premer-mınıstri Oljas Bektenov pen Ózbekstan Respýblıkasynyń Premer-mınıstri Abdýlla Arıpov Qazaqstan men Ózbekstan óńirleri basshylary keńesiniń birinshi otyrysyna qatysty.
Eki eldiń kóshbasshylary Qasym-Jomart Toqaev pen Shavkat Mırzıeevtiń birlesken sheshimimen óńiraralyq ózara is-qımyldyń jańa tetigi quryldy.
Oljas Bektenov óz sózinde Prezıdent Qasym-Jomart Toqaevtyń basshylyǵymen Qazaqstan damýdyń jańa kezeńine qadam basqanyn atap ótti. Jańa Konstıtýtsııany júzege asyrý ulttyq ekonomıkany nyǵaıtý, ınvestıtsııalyq tartymdylyqty arttyrý, bıznes úshin barynsha qolaıly jaǵdaı jasaý jáne halyqaralyq yntymaqtastyqty keńeıtý úshin berik ınstıtýtsıonaldyq negiz qalyptastyrady.
— Biz baýyrlas Ózbekstanmen strategııalyq áriptestik pen odaqtastyq qatynastardy jan-jaqty damytýǵa erekshe mán beremiz. Óńirler basshylary keńesiniń qurylýy memleketterimiz arasyndaǵy qarqyndy saıası dıalogtyń dáıekti jalǵasy bolyp, ózara senim men tatý kórshilikke negizdelgen yqpaldastyqty keńeıtýge jańa múmkindikter ashady. Sonymen birge, elderimiz arasyndaǵy saýda-ınvestıtsııalyq baılanystardy odan ári jandandyrýda óńiraralyq qarym-qatynastar orasan zor ról atqarady. Keńes jumysy eki memleket basshylarynyń belgilegen kórsetkishterin $10 mlrd-qa deıin ulǵaıtý mindetine qol jetkizýge eleýli úles qosatynyna senimdimin», — dep atap ótti Oljas Bektenov.
— Bizdiń búgingi kezdesýimiz Kaspıı teńiziniń injý-marjany ári óńirimizdiń mańyzdy kólik-logıstıkalyq haby sanalatyn Aqtaý qalasynda ótýiniń máni zor. Qazaqstan — Ózbekstan úshin jaqyn kórshi ǵana emes, senimdi strategııalyq seriktes ári odaqtas memleket. Óńiraralyq áriptestik ózara is-qımylymyzdyń basym baǵyttarynyń birine aınaldy. Osyǵan baılanysty memleketterimizdiń qurmetti prezıdentteri Óńirler basshylary keńesin qurý týraly sheshim qabyldady. Óńirlik deńgeıdegi tikeleı baılanystar ózbek-qazaq qatynastaryn odan ári nyǵaıtýǵa qýatty serpin beretinine, — dep atap ótti Abdýlla Arıpov.
Qazaqstannyń Mańǵystaý, Aqtóbe, Qyzylorda jáne Túrkistan oblystary Ózbekstan quramyna kiretin Qaraqalpaqstanmen, sondaı-aq Jyzaq, Naýaı, Syrdarııa, Tashkent oblystarymen shektesedi. Eki el arasyndaǵy memlekettik shekaranyń jalpy uzyndyǵy shamamen 2,3 myń shaqyrymdy quraıdy.
Oljas Bektenov «Ortalyq Azııa» halyqaralyq ónerkásiptik kooperatsııa ortalyǵyn tolyqqandy iske qosýdyń jáne ony ózara tıimdi ári básekege qabiletti jobalarmen tolyqtyrýdyń mańyzdylyǵyn atap ótti. Saýda-ınvestıtsııalyq yntymaqtastyqty odan ári keńeıtý úshin zamanaýı kólik-logıstıkalyq ınfraqurylymdy damytý qajettiligi atap ótildi. Qazaqstan men Ózbekstan Eýrazııa kindiginde, strategııalyq mańyzy bar negizgi kólik baǵyttarynyń torabynda ornalasqandyqtan aıtarlyqtaı áleýetke ıe.
Soltústik — Ońtústik baǵyttarymen jáne Transaýǵan dálizimen ushtasatyn Transkaspıı halyqaralyq kólik baǵytynyń mańyzy erekshe atap ótildi.
Ótken jyldyń qorytyndysy boıynsha Aqtaý jáne Quryq teńiz porttary arqyly júk tıeý-jóneltý kólemi 8 mln tonnany qurady. Osy jyldyń birinshi jartyjyldyǵynda Qazaqstan Respýblıkasynyń porttary arqyly konteınerlik tasymaldaý kólemi 5%-ǵa artyp, 50 myń JFE-den asty.
Sondaı-aq Qazaqstan men Ózbekstan arasyndaǵy týrıstik yntymaqtastyqty damytý áleýetine nazar aýdaryldy, onyń ishinde eki el azamattarynyń tarıhı-mádenı ortalyqtarǵa barýǵa degen qyzyǵýshylyǵynyń artyp kele jatqany atap ótildi.
Plenarlyq otyrysta Mańǵystaý jáne Túrkistan oblystarynyń ákimderi Nurdáýlet Qılybaı men Nuralhan Kósherov, Shymkent qalasy ákiminiń orynbasary Arman Sábıtov, sondaı-aq Jyzaq, Syrdarııa jáne Tashkent oblystarynyń ákimderi — Ýlýgbek Mýstafoev, Erkınjon Týrdımov, Zoıır Mırzaev baıandama jasady. Sonymen qatar is-sharaǵa eki eldiń 300-den astam kásipkeri qatysty.
Jıyn qorytyndysy boıynsha Qazaqstan men Ózbekstan óńirleri arasynda birqatar memorandýmǵa, sondaı-aq jalpy somasy 80 mlrd teńgeden astam kommertsııalyq qujattarǵa qol qoıyldy. Jańa ýaǵdalastyqtar baýyrlas elder men shekara mańy baılanystaryn nyǵaıtýǵa, birlesken jobalardy júzege asyrýǵa jáne Ortalyq Azııanyń ornyqty ekonomıkalyq damýyna yqpal etýi tıis.
