Aqtaýda Qazaqstan Áskerı-teńiz kúshteriniń jedel-taktıkalyq oqý-jattyǵýy aıaqtaldy
AQTAÝ. KAZINFORM – Mańǵystaý oblysynda armııa avıatsııasynyń qatysýymen Qazaqstan Respýblıkasy Qarýly Kúshteri Áskerı-teńiz kúshteriniń josparly jedel-taktıkalyq oqý-jattyǵýy ótti.
Oqý-jattyǵýdyń maqsaty barlyq dárejeli basqarý organy men komandalyq quramnyń daıyndyq deńgeıin tekserý, teńiz akvatorııasynda jaýyngerlik operatsııalardy uıymdastyrý jáne ony iske asyrý boıynsha praktıkalyq is-qımyldardy pysyqtaý boldy.
Іs-shara barysynda jeke quram birqatar oqý-jaýyngerlik epızodty: mınalardy barlap izdestirýdi iske asyrý, teńiz ekonomıkalyq qyzmet obektilerin kúzetý jáne qorǵaý, shartty qarsylastyń áýe shabýyly quraldarynyń urysyn toıtarý, sondaı-aq avarııalyq jaǵdaıdaǵy korabldi izdeý jáne ony qutqarý jónindegi is-qımyldardy pysyqtady.
Shartty qarsylastyń keme tobyna birlesken soqqy berý epızodyna erekshe nazar aýdaryldy. Bul is-qımyldy iske asyrýǵa áskerı korablder men armııa avıatsııasy, sonyń ishinde Mı-8 jáne Mı-35 tikushaqtary qatysty.
Áskerı-teńiz kúshteri dabyl boıynsha kóterilip, naqty urysqa jaqyn jaǵdaıda bólimshelerdiń jaýyngerlik daıyndyq deńgeıin tolyq tekserýge múmkindik berdi.
– Oqý-jattyǵý sheńberinde bólimshelerdi basqarýdaǵy komandalyq, ofıtserler men laýazymdy tulǵalardyń praktıkalyq daǵdylary jetildirildi, - dep atap ótti bas qolbasshynyń orynbasary – QR QK ÁTK bas qolbasshysy basqarmasy jaýyngerlik daıarlyq basqarmasynyń bastyǵy 1-dárejeli kapıtan Danııar Haırýshev.
Oqý-jattyǵý qorytyndysy boıynsha jeke quram jedel jáne taktıkalyq daıarlyq deńgeıin arttyryp, bólimsheler arasyndaǵy ózara is-qımyl, sondaı-aq Kaspıı teńiziniń qazaqstandyq sektorynda qaýipsizdikti qamtamasyz etý jónindegi mindetterdi tıimdi oryndaý qabileti boıynsha qoıylǵan maqsattarǵa qol jetkizdi.
Eske salsaq, osyǵan deıin Aqtaýda «Kaspıı samaly-2025» birlesken áskerı-teńiz jattyǵýlary ótip jatqanyn jazǵan edik.