Aqtaýda qazaq jáne koreı tilderi úıretilýde
Mańǵystaý oblysy tilderdi damytý basqarmasynyń memlekettik áleýmettik tapsyrysy negizinde uıymdastyrylyp otyrǵan jeksenbilik mektepte qazaq jáne koreı tilderin tegin úıretedi. Sonymen qatar, qatysýshylar bul mektepte qos memlekettiń mádenıeti, salt-dástúri, tarıhy men turmysy týraly bilimderin jetildiredi. Dárister ár jeksenbi saıyn ótetin bolady. Oǵan Mańǵystaý oblysynyń til úırenemin dep nıet bildirgen kez kelgen adam qatysa alady. Jeksenbilik mekteptiń ashylý kúninde-aq 25 adam tirkelip úlgerdi. Olardyń arasynda, mektep oqýshylary, stýdentter men tipti qarttar da bar.
«Adam balasy qanshalyqty kóp til bilse, sonshalyqty baı bolady. Bul jeksenbilik mekteptiń jastar men eresek býynnyń basyn qosatyny meni qýantady. Olar tek memlekettik tildi ǵana úırenip qana qoımaı, koreı tilin de meńgere alady. Sondaı-aq, qazaq halqy men koreı ultynyń uqsastyqtary men aıyrmashylyqtaryn da zertteýge bet buramyz», - deıdi «Choson» koreı etnomádenı birlestiginiń tóraıymy Raısa Madenova.
Jeksenbilik mektep aǵymdaǵy jyldyń qazan, qarasha aılarynda da ótken edi. Oǵan orys, káris, ázirbaıjan, ýkraın ultynan quralǵan 18 adam memlekettik tildi úırenip, arnaıy sertıfıkattarmen marapattalǵan bolatyn.
