Aqtaýda kater jartasqa soqtyǵysyp, eki adam qaza tapty
AQTAÝ. KAZINFORM — Aqtaýda Kaspıı teńiziniń akvatorııasynda serýendeý kateri jartasqa soqtyǵysyp, saldarynan eki adam mert boldy.
Mańǵystaý oblystyq tótenshe jaǵdaılar departamentiniń málimetinshe, qaıǵyly oqıǵa 30 tamyz kúni keshke 5A shaǵynaýdany mańynda bolǵan. Oqıǵa týraly habarlama qutqarý qyzmetine saǵat 22:56–da túsken.
Katerdiń bortynda jeti adam bolǵan. Qutqarý jumystary barysynda bes adam jaǵaǵa shyǵarylyp, medıtsınalyq qyzmetkerlerge tapsyrylǵan.
Al katerdegi taǵy eki adamnyń aldyn ala málimet boıynsha, qutqarý keýdeshesin kımegeni anyqtalǵan. Іzdeý-qutqarý jumystary kezinde qutqarýshylar jaǵadan shamamen 500 metr qashyqtyqtan eki adamnyń denesin sýdan alyp shyqty.
Oqıǵa ornyna oblystyq tótenshe jaǵdaılar departamentiniń 35 qyzmetkeri, tórt tehnıkasy jáne tórt júzý quraly jumyldyryldy.
Sonymen qatar polıtsııanyń 10 qyzmetkeri men tórt tehnıkasy, Apattar medıtsınasy ortalyǵynyń mamandary jáne jedel járdemniń bes brıgadasy jumys istedi. Qazirgi ýaqytta oqıǵanyń mán-jaıy men sebepteri anyqtalyp jatyr.
Mańǵystaý oblystyq kópbeıindi aýrýhanasynyń baspasóz qyzmetiniń málimetinshe, oqıǵa saldarynan bes er adam zardap shegip, medıtsınalyq kómekke júgingen.
— Tórt naýqastyń denesiniń birneshe bóliginen túrli jaraqat anyqtalyp, qazirgi ýaqytta aýrýhanada em qabyldap jatyr. 1988, 2002 jáne 1964 jyly týǵan úsh naýqas jalpy jansaqtaý bólimine jatqyzyldy. Olardyń jaǵdaıy aýyr, dárigerlerdiń turaqty baqylaýynda jáne tıisti em alyp jatyr. 1985 jyly týǵan naýqastyń jaǵdaıy turaqty. Ol travmatologııa bólimshesinde em qabyldaýda. Al 1996 jyly týǵan taǵy bir naýqasqa qajetti medıtsınalyq kómek kórsetilgennen keıin ambýlatorlyq em alýǵa jiberildi, — delingen habarlamada.
Buǵan deıin, Mańǵystaýda jetkinshek qyzdy jabylyp urǵan bir top jasóspirim ustalǵanyn jazǵanbyz.
