Aqtaýda kásipker balalarǵa tegin balmuzdaq taratqany úshin aıyppul arqalady
AQTAÝ. KAZINFORM — Aqtaýlyq kásipker balalarǵa tegin balmuzdaq pen ıogýrt taratamyn dep ákimshilik jaýapkershilikke tartyldy.
— Oqıǵa 1 tamyz kúni 14-shaǵyn aýdanda ornalasqan kásipkerlik nysandardyń birinde bolǵan. Saýda ornynyń ashylýyna oraı kásipker balalarǵa tegin 50 balmuzdaq pen 30 ıogýrt úlestirgen.
Alaıda mundaı aktsııany ótkizer aldynda jergilikti atqarýshy organnan tıisti ruqsat alý qajet, — deıdi qala ákimdigi.
Osy talap saqtalmaǵandyqtan, kásipkerge Ákimshilik quqyq buzýshylyq týraly kodeks talaptaryna sáıkes 20 aılyq eseptik kórsetkish (86 500 teńge) kóleminde aıyppul salyndy.
Aqtaý qalasy ákimdiginiń málimetinshe, kásipkerlerdiń mundaı bastamasyna qarsylyq joq, alaıda tegin ónim taratý qoldanystaǵy zańnama talaptaryna saı uıymdastyrylýy tıis.
— Osyndaı is-sharalardy ótkizer aldynda jergilikti atqarýshy organnyń tıisti ruqsatyn alý qajet. Sondaı-aq balalardy qýantý úshin qaýipsiz ári zańdy tásilderdi qarastyrǵan jón. Óıtkeni mundaı aktsııalar kezinde adamdardyń jappaı jınalýy túrli qolaısyz jaǵdaılarǵa sebep bolýy múmkin, — dep málimdedi qala ákimdigi.
Buǵan deıin, Mańǵystaýda qutqarýshylar jaǵalaýdan qashyqtap ketken jupqa kómektesti.
