Aqtaýda Kaspıı jaǵalaýyndaǵy zańsyz berilgen jerler memleketke qaıtaryldy
ASTANA. KAZINFORM – Aqtaý qalasynda Kaspıı teńiziniń jaǵalaýynan kommertsııalyq maqsatta berilgen 5,9 gektar jer sot sheshimimen memleket menshigine qaıtaryldy.
Bul týraly Aýyl sharýashylyǵy mınıstrliginiń Jer resýrstaryn basqarý komıteti habarlady.
Mańǵystaý oblysy boıynsha jer resýrstaryn basqarý departamenti júrgizgen jospardan tys tekserý barysynda jer ýchaskeleriniń zań talaptaryn buza otyryp berilgeni anyqtalǵan.
Atap aıtqanda, Kaspıı jaǵalaýyndaǵy kommertsııalyq maqsattaǵy jerler mindetti saýda-sattyq ótkizilmesten jeke tulǵalarǵa nemese kásipkerlik sýbektilerine berilgen.
– Departament júrgizgen jospardan tys tekserý kezinde jer ýchaskelerin berý barysynda zańnama talaptarynyń buzylǵany anyqtaldy. Atap aıtqanda, jer ýchaskeleri saýda-sattyq ótkizilmeı berilgen, – dep habarlady mınıstrlik.
Anyqtalǵan zańbuzýshylyqtardy joıý úshin departament Mańǵystaý oblysynyń mamandandyrylǵan aýdanaralyq ekonomıkalyq sotyna talap-aryz túsirgen.
Sot isti qarap, departamenttiń talaptaryn tolyq qanaǵattandyrdy. Nátıjesinde jalpy aýdany 5,9 gektar bolatyn jer ýchaskeleri memleket menshigine qaıtaryldy.
Mınıstrlik jer zańnamasynyń saqtalýyn baqylaý jáne memleket múddesin qorǵaý baǵytyndaǵy jumystar jalǵasatynyn málimdedi.
Aıta keteıik, buǵan deıin Aqtaýda Jer kodeksiniń talaptaryn buza otyryp berilgen 36 gektarǵa jýyq jer memleket menshigine qaıtarylǵan edi. Sot sheshimimen kadastrlyq quny 646,1 mln teńge bolatyn úsh jer ýchaskesi memleketke ótken.
