Aqtaýda Kaspıı teńizinen aǵys alyp ketken bes jasóspirim qutqaryldy
ASTANA. KAZINFORM — Tótenshe jaǵdaılar mınıstrliginiń qyzmetkerleri Kaspıı teńizinde shomylyp júrgen bes jasóspirimdi qutqaryp qaldy. Teńizdegi qatty tolqynnyń saldarynan olar jaǵadan alystap ketip, ózdiginen orala almaǵan.
Oqıǵa Aqtaýdaǵy Kaspıı teńizi jaǵalaýynda TJM qyzmetkerleri úgit-nasıhat jáne profılaktıkalyq is-sharalar ótkizip jatqan kezde bolǵan.
Vedomstvonyń málimetinshe, teńizdegi qatty tolqyn saldarynan jasóspirimder jaǵaǵa óz kúshimen shyǵa almaǵan.
Qutqarýshylar jedel áreket etip, kómekke kelip, bes jasóspirimniń bárin aman-esen jaǵaǵa jetkizdi.
Olarǵa medıtsınalyq kómek qajet bolǵan joq.
QR TJM qazaqstandyqtardy sý aıdyndarynda asa saq bolýǵa úndedi. Sý kólikterin paıdalanar aldynda olardyń tehnıkalyq jaǵdaıyn muqııat tekserip, aýa raıyn eskerip, qaýipsizdik erejelerin qatań saqtaý qajet. Tótenshe jaǵdaı týyndaǵan jaǵdaıda 112 nómirine habarlasý kerek.
Eske salaıyq, buǵan deıin Almaty taýlarynda adasyp ketken úsh jasóspirim qutqarylǵanyn habarlaǵanbyz.
