Aqtaýda Kaspıı teńizine Qyzyl kitapqa engen albyrt shabaqtary jiberildi

AQTAÝ. KAZINFORM — Sırek kezdesetin Kaspıılik albyrt (losos) balyǵynyń 582 shabaǵy 15-shaǵyn aýdanyndaǵy Kaspıı teńizine jiberildi. Ekologııalyq aktsııa Mańǵystaý oblystyq balyq sharýashylyǵy basqarmasynyń qoldaýymen uıymdastyryldy.

Shabaqtar Aqtaýdaǵy zamanaýı balyq ósirý kesheninde ósirilgen. Atalǵan keshen bıofıltratsııa, dezınfektsııa, ottegimen qanyqtyrý jáne sý temperatýrasyn baqylaý júıelerimen jabdyqtalǵan.

— Sharanyń basty maqsaty — Kaspıı teńizinde joıylyp bara jatqan balyq túrleriniń sanyn qalpyna keltirip, ekologııalyq tepe-teńdikti saqtaý. Salmaǵy 300 gramnan asqan shabaqtardyń tabıǵı ortada tiri qalý múmkindigi 20 paıyzdan joǵary. Biraq olar úshin zańsyz balyq aýlaý, jyrtqysh balyqtar qaýipti, — deıdi uıymdastyrýshylar.

Buǵan deıin, 21 mamyr kúni teńizge 109 shabaq jiberilgen. Jyl sońyna deıin jalpy sany 3 myńnan astam shabaqty tabıǵı ortaǵa jiberý josparda. 

Aıta keteıik, Kaspıılik albyrt — tek Kaspıı teńizinde ǵana mekendeıdi. Ol Qazaqstannyń Qyzyl kitabyna engizilgen jáne ony aýlaýǵa zań júzinde qatań tyıym salynǵan. Sebebi, sońǵy jyldary bul balyqtyń popýlıatsııasy kúrt azaıyp ketti.

Buǵan deıin, Aqtaýlyq súńgýir teńiz astyndaǵy bir shaqyrymnan astam aýmaqty qoqystan tazalaǵanyn jazǵan bolatynbyz.