Aqtaýda Kaspıı teńizi jaǵalaýynda shashylyp jatqan et qaldyqtary turǵyndardyń ashýyn týdyrdy
AQTAÝ. KAZINFORM — Aqtaýda jaǵalaýǵa et qaldyqtaryn shashyp ketkender izdestirilip jatyr. Oqıǵa keshe 21 maýsym kúni bolǵan. 15 shaǵynaýdan jaǵalaýyna demalýǵa barǵan turǵyndar sýda úıilip jatqan taýyq qanattaryn kórgen.
Mańǵystaý oblystyq tabıǵı resýrstar jáne tabıǵat paıdalanýdy retteý basqarmasynyń málimetinshe, atalǵan aýmaqqa jaýapty mamandar jiberilip, jaǵalaý tekserilgen. Sonymen qatar sanıtarlyq tazalaý jumystary uıymdastyrylǵan.
Aldyn ala málimet boıynsha, bul oqıǵaǵa azamattardyń tazalyq talaptaryn saqtamaýy sebep bolýy múmkin. ıAǵnı demalystan keıin qoqys, qaptamalar men tamaq qaldyqtaryn jaǵalaý aýmaǵynda qaldyrý jaǵdaılary bolǵan.
- Qazirgi ýaqytta aýmaqty lastaǵan adamdardy anyqtaý boıynsha jumystar júrgizilip jatyr. Tıisti negizder bolǵan jaǵdaıda materıaldar zańnama aıasynda shara qoldaný úshin quzyrly organdarǵa joldanady, - delingen habarlamada.
Mamandar turǵyndar men qala qonaqtaryn sanıtarlyq jáne ekologııalyq talaptardy saqtaýǵa, demalystan keıin qoqys pen taǵam qaldyqtaryn qaldyrmaýǵa, arnaıy konteınerlerdi paıdalanýǵa shaqyrdy.
- Kaspıı jaǵalaýy – Aqtaýdyń basty kórikti oryndarynyń biri, turǵyndar men qala qonaqtary jıi demalatyn oryn. Onyń tazalyǵy tek kommýnaldyq qyzmetterdiń ǵana emes, qoǵamdyq orynda júrgen ár adamnyń jaýapkershiligine baılanysty, - deıdi basqarma ókilderi.
Buǵan deıin, Mańǵystaýda balabaqshada bala pyshaq jaraqatyn alyp, dırektor qyzmetinen bosatylǵany týraly jazdyq.
