Aqtaýda Kaspıı teńizin zertteıtin ǵylymı ortalyq ashyldy
Óńirdegi memlekettik ýnıversıtet bazasynda jumysyn bastaǵan ortalyqta teńizdegi balyqtar men ósimdikter týraly tolyq aqparat jınaqtalyp, keshendi taldaý júrgiziledi. Bul jumystarǵa el ǵalymdarymen qatar, Reseı, Ońtústik Koreıa jáne Ázerbaıjan mamandary atsalysady.
Aldaǵy aptada óńirge Máskeý memlekettiń ýnıversıteti okeanologııa ınstıtýtynyń ǵalymdary kele jatyr. Olar aqtaýlyq áriptesterimen birlesip, balyqtardyń popýlıatsııasyn zerttep, olardyń júzý aǵysynyń baǵytyn anyqtaıdy. Teńiz sýy men ondaǵy tirshilik ıelerinen synama alynyp, jan-jaqty tekseris júrgiziledi.
«Bul joba Kaspııdegi ekologııalyq qaýiptiń aldyn alýǵa jáne teńizdegi balyq qoryn molaıtýǵa múmkindik beredi» deıdi ǵalymdar.
«Tehnogendi apattar bolǵan jaǵdaıda ǵana jınalyp, ǵalymdar shaqyrylyp, sonyń bir qorytyndysy ǵana aıtylyp ketetin. Al teńizdiń kúndelikti tynys-tirshiligin júrgizip otyratyn, zerttep otyratyn ortalyq joq. Osyǵan baılanysty osy joba qolǵa alynyp, qazir óz jumysyn bastap ketti. Aldaǵy 3 jyl ishinde osy deńgeıde bir zertteýler júrgizip, osy Mańǵystaý ólkesiniń, elimizdiń balyq sharýashylyǵyn kórkeıtýge, kóbeıtýge barymyzdy salamyz dep josparlap otyrmyz»,-dedi Yessenov Ýnıversıteti rektorynyń ǵylymı jumystar jónindegi orynbasary Ermek Nurmaǵanbet.