Aqtaýda káriz sýyn tazartatyn qondyrǵy paıdalanýǵa beriledi
ASTANA. QazAqparat - Oblys ákimi Eraly Toǵjanov Aqtaýdaǵy eki qurylys nysanyn aralap, jumys barysymen tanysty. Bul týraly QazAqparat ákimdiktiń baspasóz qyzmetine silteme jasap habarlaıdy.
Aqtaý qalasyndaǵy «Aqqý-1» turǵyn úı kesheniniń qurylysy 2008 jyly bastalǵan bolatyn. 2012 jyly aqaýlar anyqtalyp, jumys toqtatyldy. Qurylys jáne turǵyn úı-kommýnaldyq sharýashylyq isteri komıtetiniń sheshimimen nysanda kúsheıtý jumystary bastalyp, 2015 jyly 30 maýsymda aıaqtaldy. Turǵyn úı kesheniniń qurylysyn aıaqtaýǵa úsh merdiger kompanııa: «Ońdasyn stroı», «Evrostroı» jáne «Elın grýp» belgilendi. Qazirgi tańda 297 páter qonystanýǵa berilmek.
«Bul qurylysy uzaqqa sozylǵan «Aqqý» turǵyn-úı keshenin paıdalanýǵa berý - oblys ákiminiń basty tapsyrmalarynyń biri. Ózderińiz bilesizder, úı qurylysy 2008 jyly bastalǵan. Onyń 5 jylynda nysanda eshqandaı qurylys jumystary júrgizilmedi. Munda shamamen 650 páter bar. Osy aıdyń sońynda 300-den astam páter paıdalanýǵa berilmek. Al qalǵan 300 páterdi osy jyly 1 qyrkúıekke deıin berý josparlanǵan. Osy ýaqytta «Aqqý-1» tolyqqandy keshenge aınalady. Buryn bul úıdiń tóńireginde týyndaǵan máselelerge qatysty kúdikti joıý úshin "Qazaq qurylys jáne sáýlet ǵylymı-zertteý jáne jobalaý ınstıtýtynan" mamandar shaqyrylyp, tekseris júrgizdik. Olar keshenniń paıdalanýǵa jaramdy ekenin rastap, jazbasha anyqtama berdi», - dedi oblys ákiminiń birinshi orynbasary Serik Amanǵalıev.
Jaqynda paıdalanýǵa beriletin taǵy bir nysan - káriz sýyn tazartatyn qondyrǵy.
«Bul - kópten sheshimin tappaı kele jatqan másele. Eraly Luqpanuly muny qolǵa alyp, qysqa merzimde iske qosýǵa múmkindik berdi. Negizinen óte qomaqty joba. Qalanyń soltústik baǵytyna, joǵary jaqtaǵy shaǵyn aýdandarǵa arnaıy salynyp jatyr. Kólemi 70 myń sharshy metrge arnalǵan. Eki etaptan turady: birinshisi - 40 myń, ekinshisi - 30 sharshy shaqyrym. Qazir birinshi etap iske uosylý satysynda. Qyrkúıek aıyna deıin qosýdy josparlap otyrmyz. Jumystyń 95 paıyzy aıaqtaldy. Keıbir detaldary jetispeýine baılanysty kishkene bógelip tur. Qazir qaladan shyǵyp jatqan 20 myń sharshy metr shamasyndaǵy sýdy osynda baǵyttaımyz. Eski stantsııa óz qýattylyǵyna saı jumys istep tur», - dedi Mańǵystaý oblysynyń Energetıka jáne turǵyn úı-kommýnaldyq sharýashylyq basqarmasynyń basshysy Sapar Amanbekov.
