Aqtaýda «Qarajanbasmunaı» AQ jumyskerleriniń jańa kásipodaǵy quryldy
ASTANA. 14 qyrkúıek. QazAqparat - «Qarajanbasmunaı» AQ jumyskerleriniń jańa kásipodaǵy quryldy. Bul týraly kásipodaqtyń baspasóz qyzmetinen málim etti.
12 qyrkúıek kúni Aqtaýdaǵy «Qarajanbasmunaı» AQ-da kompanııa jumyskerleriniń jańa kásipodaǵyn qurý boıynsha quryltaılyq konferentsııa ótti. Konferentsııa delegattary ashyq daýys berý arqyly kásipodaq komıtetiniń tóraǵasy etip bý ázirleý tsehynyń aǵa mehanıgi Kóben Tóremuratty saılady. Konferentsııa jumysyna Mańǵystaý oblystyq kásipodaq keńesiniń tóraǵasy Imamadı Aınalıev jáne «Qarajanbasmunaı» AQ-daǵy «Nur Otan» partııasy bastaýysh partııalyq uıymynyń tóraǵasy Bısen Túsipov qatysty.
K.Tóremurat eki joǵary bilimi bar, «Qarajanbasmunaı» AQ-da 1992 jyldan beri jumys istep keledi.
