Aqtaýda qaptamasy opyrylyp túsken úı jóndelip jatyr
Buǵan deıin Aqtaýda kópqabatty ǵımarattyń qasbeti qulap, gaz qubyry búlingenin jazǵan bolatynbyz.
Endi ákimdikten bólingen qarajat esebinen 169-úıdiń syrty sońǵy úlgidegi termopaneldermen qaptalady. Qazir 16 jumysshy qurylys ornynda kúni-túni eńbek etýde. Jospar boıynsha 2 aı ishinde aıaqtalýy tıis. Turǵyndardyń qaýipsizdigi úshin ajyratylǵan gaz qaıta qosylmaı otyr. Sondyqtan jurt jumystyń tezirek aıaqtalýyn kútedi.
«Barlyq kórshi elektr plıtasyn qoldanyp otyr. Jumystar 1-2 aıdyń arasynda aıaqtalatynyna qýanyshtymyz. Buıyrsa, ádemi úı bolady degen úmittemiz», - dedi múlik ıeleri birlestiginiń basshysy Álibek Dúısen.
Úıdi salǵan qurylys mekemesiniń basshylarymen komıssııa quryldy. Tekseristen keıin aqaýy bar jerlerdi qaıta jasaý týraly sheshim qabyldandy.