Aqtaýda qant dıabetine shaldyqqan naýqastar tegin dáriden qaǵylyp, tyǵyryqqa tireldi
AQTAÝ. KAZINFORM – Aqtaýda qant dıabetine shaldyqqan naýqastar osy kezge deıin tegin alyp kelgen «Trýlısıtı» preparatyn ala-almaı, qıyn jaǵdaıǵa tap boldy. Sebebi, atalǵan preparat tegin beriletin dári-dármekter tiziminen alynyp tastalǵan. Al, turǵyndar ony óz qarajatyna satyp alaıyn dese, preparat dárihanalarda satylmaıtyn bolyp shyqty.
Aqtaý qalasynyń turǵyny Oksana Terehına 8 jyl buryn «2-tıpti qant dıabetiniń asqynýlary» dıagnozymen esepke alynǵan. Aýrýdyń saldarynan onyń sol kózi tolyq kórmeı, aıaǵynda jazylmaıtyn jara paıda bolǵan. Sozylmaly aýrýmen kúresýge oǵan «Trýlısıtı» preparaty kómektesken. Alaıda, bıyl jyl basynan bastap atalǵan dári tegin beriletin dári-dármekter tiziminen alynyp tastalǵan. Saldarynan naýqastyń qan quramyndaǵy qant deńgeıi kúrt kóterilip, aýyr jaǵdaıǵa dýshar bolǵan.
– Dárim bitip qaldy. Qabyldamaǵanyma úsh apta boldy. Qazir mende qant mólsheri óte joǵary bolyp tur. Sonyń saldarynan ózimdi óte nashar sezinemin. Meniń kózim kórmeıdi, aıaǵymda jara bar, maǵan bulaı júrýge múldem bolmaıdy. «Trýlısıtı» preparaty maǵan jaqsy kómektesedi. Ony qabyldaǵanda qant deńgeıi shamamen 10-ǵa deıin túsetin. Qazir 25-ke deıin kóterilip tur. Bul dári maǵan sáıkes keletin, sebebi ol qantty tómendetýge kómektesedi. Sebebi, mende ınsýlınge tózimdilik bar, - deıdi Oksana Terehına.
Naýqas áıel aıaǵy men kózine birneshe ret operatsııa jasatqan. Al, «Trýlısıtı» preparaty jaǵdaıyn turaqty deńgeıde ustaýǵa kómektesken. Endi bul dáriniń joqtyǵynan densaýlyǵy kúnnen-kúnge nasharlap barady.
Mańǵystaý oblystyq densaýlyq saqtaý basqarmasynyń dári-dármekpen qamtamasyz etý boıynsha bas mamany Janar Tólebaevanyń aıtýynsha, «Trýlısıtı» preparaty ómirlik mańyzy bar dáriler qataryna jatpaıdy. ıAǵnı, bul dári dıabetti emdeýdegi negizgi preparattar qataryna kirmeıtin bolyp shyqty. Sondyqtan Densaýlyq saqtaý mınıstrliginiń formýlıarlyq komıssııasynyń sheshimimen, bıyldan bastap ony berý toqtatylǵan.
– Bul preparat árqashan qosymsha em retinde qoldanylyp kelgen. Qazirgi tańda tıisti buıryqqa sáıkes bizde qant dıabetin emdeýge arnalǵan 9 preparat jáne 7 túrli ınsýlın saqtalǵan. Sonymen qatar dıabetpen aýyratyn balalar ınsýlın engizýge arnalǵan pompalarmen qamtamasyz etiledi, - deıdi oblystyq densaýlyq saqtaý basqarmasynyń dári-dármekpen qamtamasyz etý boıynsha bas mamany Janar Tólebaeva.
Aıta keteıik, aımaqta «Trýlısıtı» preparatyn shamamen 20 adam qabyldap kelgen. Endi, bul naýqastar aǵzalaryna sáıkes dárini qaıdan tabaryn bilmeı otyr. Óıtkeni, bul preparat elimizde satylmaıdy, shetelden satyp alý qaltaǵa salmaq túsiredi. Sebebi, «Trýlısıtı» 4 shprıtstiń baǵasy shamamen 100 myń teńge turady.
Al, densaýlyq saqtaý basqarmasynyń ókili naýqastarǵa «Trýlısıtıge» balama preparatqa kóshýge keńes berdi.
Buǵan deıin, Aqtaýda kommýnaldyq kásiporynǵa aıyppul salynyp, tarıf arzandaǵanyn jazǵan bolatynbyz
