Aqtaýda qandala ýynan taǵy da bir otbasy ýlandy
Jedel járdem brıgadasy 42 jastaǵy áıelge jáne 15 pen 10 jasar eki qyzyna hımııalyq zattarmen ýlanǵan degen dıagnoz qoıǵan. Ózderin jaısyz sezingenderi eskerilip, shuǵyl túrde anasyn oblystyq aýrýhanaǵa, al qyzdardy kópbeıindi balalar aýrýhanasyna jetkizgen. Áıelge tıisti medıtsınalyq kómek kórsetilgen soń, úıine jiberilgen. Alaıda eki qyzyn aýrýhanaǵa jatqyzýǵa týra keldi.
«Kepildendirilgen tegin medıtsınalyq kómek aıasynda qyzdarǵa barlyq em-dom sharalary jasaldy. Jaǵdaılary turaqty. Ómirlerine tónip turǵan qaýip joq. Eki-úsh kúnde úıine jiberiledi dep kútilýde»,-dep habarlady oblystyq densaýlyq saqtaý basqarmasynyń baspasóz qyzmeti.
Zardap shegýshi ıÝlııa Moldovannyń aıtýynsha, bul jaǵdaı osydan eki kún buryn bolǵan.
«Kelgen bette jaǵymsyz ıistiń baryn sezdim, úıde úlken qyzym bar edi, sodan surasam bul ıistiń paıda bolǵanyna biraz bolǵanyn aıtty. Tótenshe jaǵdaılar jáne polıtsııa departamentterine habarlastym. Olar kele salysymen úıdiń ıesin taýyp, shaqyrtqan bolatyn. Úıine kirip qarasaq rasynda da qandalany ýlaımyn dep esigin kilttep, ózderi basqa mekenjaıǵa ketip qalǵan. Nege kórshilerdi eskertpedińiz dese, ne úshin eskertýim kerek dep jeńistik bermedi. Alǵashynda aýany tazartý úshin balkondaǵy terezeni ashyp bir táýlikke qaldyrǵan edi. Al keshe úıge kelsem taǵy da terezeni jaýyp ketken, qaıtadan jaǵymsyz ıisti sezindik. Qusqymyz kelip, basymyz aınaldy, qyzdarymnyń jaǵdaıy birden nasharlaı túskenin baıqadym, úıde otyrý múmkin bolmaǵan soń jedel járdem stantsııasyna habarlastym. Osylaı balalar aýrýhanasynan bir-aq shyqtyq. Eki kún boldy, qajetti medıtsınalyq kómegin alyp jatyr. Dárigerlerge alǵysym sheksiz, kúndiz-túni qasymyzda. Endi kórshimniń ústinen shaǵym túsiremin, tıisti jazasyn alsyn», - deıdi ol.
Aıta ketý kerek, jyl basynan beri qandalany ýlaý kezinde kórshi páter turǵyndarynyń hımııalyq zattan ýlaný boıynsha bul ekinshi oqıǵa. Al ótken jyly osyndaı derek boıynsha jedel járdem qyzmetine turǵyndar 13 ret telefon shalǵan. Ókinishke oraı, munyń saldarynan kóz jumǵandar boldy, aralarynda kámelettik jasqa tolmaǵan jáne eresekter de bar.